Pra heta stała viadoma padčas sustrečy ministra zamiežnych spraŭ Uładzimira Makieja z pasłom Izraila Iosifam Šahałam. Jak paviedamlaje pres-słužba źniešniepalityčnaha viedamstva, sustreča prajšła ŭ suviazi sa skančeńniem dypłamatyčnaj misii pasła.
«Padčas sustrečy Šahał pieradaŭ notu ab vykanańni izrailskim bokam unutrydziaržaŭnych pracedur, nieabchodnych dla ŭstupleńnia ŭ siłu Pahadnieńnia pamiž Uradam Respubliki Biełaruś i Uradam Dziaržavy Izrail ab skasavańni viz dla ŭładalnikaŭ nacyjanalnych pašpartoŭ, padpisanaha ŭ Minsku 19 vieraśnia 2014 h.», — havorycca ŭ paviedamleńni.
U adpaviednaści z artykułam 7 Pahadnieńnia ab skasavańni viz dla ŭładalnikaŭ nacyjanalnych pašpartoŭ dakumient ustupaje ŭ siłu praz 90 dzion z daty atrymańnia pa dypłamatyčnych kanałach apošniaha piśmovaha paviedamleńnia, jakimi baki infarmujuć adzin adnaho ab vykanańni ŭnutrydziaržaŭnych pracedur, nieabchodnych dla ŭstupleńnia pahadnieńnia ŭ siłu.
Takim čynam, pahadnieńnie ŭstupić u siłu 26 listapada 2015 hoda.
U ramkach pahadnieńnia hramadzianin adnoj krainy zmoža ŭjechać na terytoryju inšaj krainy pa nacyjanalnym pašparcie bieź nieabchodnaści ŭ vizie. Znachodžańnie na terytoryi inšaj dziaržavy bieź vizy nie pavinna pieravyšać 90 dzion na praciahu paŭhoda z daty ŭjezdu.
Pahadnieńnie padpisanaje terminam na adzin hod i budzie praciahvacca aŭtamatyčna da taho času, pakul adzin z bakoŭ nie paviedamić druhomu ab žadańni vyjści z pahadnieńnia.
