Alaksandr Łukašenka ličyć, što situacyja ŭ Biełarusi ŭ 2016 hodzie pačnie palapšacca. Pra heta jon zajaviŭ siońnia ŭ čas razmovy z pracoŭnym kalektyvam AAT «Baranavickaje vytvorčaje bavaŭnianaje abjadnańnie».
«Nam treba prajści hety hod narmalna. Pahladzim, što budzie ŭ kancy hoda», — adznačyŭ kiraŭnik dziaržavy.
«Upeŭnieny, u nastupnym hodzie my pačniem vykaraskvacca z hetaha stanovišča, choć my nie abvalilisia tak, jak inšyja», — padkreśliŭ Alaksandr Łukašenka. Jon adznačyŭ, što ŭ krainie jość prablemy, adnak niama abvału.
«Vy bačycie, naš bližejšy partnior — Kazachstan, pa-mojmu, užo treci raz za apošnija dva hady abvaliŭ, razava devalvavaŭ svaju valutu. I heta kraina, jakaja siadzić na karysnych vykapniach. Vy bačycie, što adbyvajecca ŭ Rasii: za apošnija dva hady try razy abvaliłasia valuta i, zdavałasia b, kanca kraju niama, ale pajšła niejkaja stabilizacyja», — skazaŭ kiraŭnik dziaržavy.
Pavodle jaho słoŭ, siońnia krainy ŭžo nie dumajuć pra toje, što budzie ŭ vyniku devalvacyi valuty, bolš dumajuć pra toje, «jak utrymacca ŭ hetym burnym patoku, nie spynić vytvorčaści i choć na minimumie prajści hety pieryjad».
Alaksandr Łukašenka ŭpeŭnieny, što ciapierašniaja situacyja pieraadolnyja, «tak uvieś čas nie budzie».