Biełaruski kłub u piaty raz u historyi budzie hulać u hrupavym etapie futbolnaj Lihi čempijonaŭ. Paćvierdziłasia praviła, što ŭ raŭndzie płej-of Lihi čempijonaŭ naš čempijon jašče nie prajhravaŭ apanientam. Piać pieramoh u piaci duelach.
Na hety raz u roli niaŭdačnika vystupiŭ białhradski «Partyzan». Kamanda sa słaŭnym minułym, ale ź nie samaj jarkaj sučasnaściu. Hulnia tydniovaj daŭniny pryniesła minimalnuju pieramohu BATE — 1:0. Adziny miač naprykancy hulni zabiŭ Michaił Hardziajčuk.
Niekatoryja futbolnyja śpiecyjalisty papiaredžvali, što ŭ Białhradzie my možam ubačyć absalutna inšy «Partyzan». Bolš metanakiravany i kancentravany. Tym bolš pry takoj padtrymcy rodnych trybun.
Dy nie, BATE znoŭ daminavaŭ. Asabliva ŭ pieršym tajmie kamanda Alaksandra Jermakoviča całkam pierajhravała supiernika. Nie dziva, što lik na 25-aj chvilinie adkryŭ Ihar Stasievič, paśla taho jak vychad adzin na adzin nie realizavaŭ Michaił Hardziajčuk.
Varta adznačyć, što pierad hetym traŭmu atrymaŭ naš forvard Vital Radzivonaŭ, jaho zamianiŭ Mikałaj Sihnievič.
Adnak bieź niervavańnia ŭ druhim tajmie ŭsio ž nie abyšłosia. Na 74-aj chvilinie BATE prapuściŭ davoli durny hoł. Była ataka ź levaha fłanha, Pietravič prabiŭ pa varotach, ale miač trapiŭ u našaha abaroncu Maksima Žaŭnierčyka i ŭskałychnuŭ sietku.
«Partyzan» adčuŭ pach kryvi i rynuŭsia atakavać. U kampiensavany čas sierby vyrvali pieramohu. Paśla pamyłki Černika adznačyŭsia Šaponič — 1:2.
BATE viartajecca ź Białhrada z parazaj u kankretnaj hulni, ale ź pieramohaj u sumie dvuch matčaŭ. Naša kamanda znoŭ budzie hulać u Lizie čempijonaŭ. Losavańnie adbudziecca zaŭtra.
