U Biełarusi stvarajecca hramadskaje abjadnańnie «Matčyn ruch 328», udzielniki jakoha — baćki, čyich dziaciej asudzili da vialikich terminaŭ za raspaŭsiud narkotykaŭ.
Hrodzienskaja aktyvistka Łarysa Žychar. Jaje ŭłasny syn trapiŭ za kraty u 18 hod — jamu dali 8 hod pa č. 3 art.328.
«Šmatlikija dzieci siadziać pa raznaradcy, dziela vykanańnia płana zatrymańniaŭ. Sapraŭdnyja ž narkabarony, jakija varociać miljardami, dahetul na voli. Heta niespraviadliva, na našu dumku», — rasskazała «Našaj Nivie» hrodzienskaja aktyvistka Łarysa Žychar.
«Ruch zadumany jak ahulnabiełaruski, ale aficyjna my pakul stvorym haradskoje hramadskaje abjadnańnie ŭ Hrodnie, —praciahnuła žančyna, — Dalej budzie vidać, bo našy adnadumcy žyvuć va ŭsich haradach krainy. Rehistracyja patrebna dla taho, kab nas bolš nie šturchała milicyja i prakuratura, maŭlaŭ, my nichto. A tak na nas źviarnuć uvahu i ŭładam daviadziecca pryznać, što takaja prablema isnuje. Naša prahrama maksimum — heta pierahlad spraŭ asudžanych dziaciej i cisk na orhany z metaj pošuku sapraŭnych lalkavodaŭ narkatrafiku ŭ Biełarusi. My ŭžo źbirajem podpisy pad adpaviednymi zvarotami pa ŭsioj krainie. Nieŭzabavaje hetyja zvaroty my nakirujem da deputataŭ usich uzroŭniaŭ, u hienprakuraturu i da Alaksandra Łukašenki».
Pa słovach aktyvistki, kali zvaroty nie daduć plonu, to «Matčyn ruch 328» pojdzie ŭ apošnija instancyi: AAN i sud u Strasburhu.
«My budziem pisać prezidentu ŭ nadziei, što jon uśviadomić — vielmi žorstka kazać na ŭsiu krainu, što padletki pavinny siadzieć i prasić śmierci [havorka pra Dekret №6]. Miž tym, mnohija ź ich upieršyniu patrapili za kraty, a niekatoryja navat upieršyniu trymali ŭ rukach narkotyki. A ich sadziać na 15 hadoŭ! Niekatorych dziaciej prosta vykarystali», — skazała taksama Łarysa.
Pry kancy minułaha hoda Śledčy kamitet paviedamiŭ pra zatrymańnie dvuch supracoŭnikaŭ KDB i adnaho milicyjanta. Hetaja hrupa praciahły čas zajmałasia pastaŭkami spajsaŭ z Rasii ŭ Biełaruś i zarabiła na hetym blizu 32 miljardaŭ rubloŭ.
Novaje zakanadaŭstva ŭzmacniła pakarańni za raspaŭsiud narkotykaŭ. Jaho pryniaćcie dyktavałasia nieabchodnaściu spynić raspaŭsiud spajsaŭ, jakija litaralna kasili moładź.
