Na sajcie Śledčaha kamiteta 22 žniŭnia źjaviłasia infarmacyja ŭ dačynieńni da abvinavačanych i padazravanych pa «spravie hraficistaŭ», jakaja parušaje prezumpcyju nievinavataści zatrymanych.
«U chodzie rasśledavańnia kryminalnaj spravy, u tym liku ŭ vyniku ahladu kanfiskavanaj u chodzie pieratrusaŭ kamputarnaj techniki, byli ŭstanoŭlenyja fakty vykarystańnia i raspaŭsiudžvańnia ŭ sietcy Internet asobami, pryciahnutymi pa kryminalnaj spravie ŭ jakaści padazravanych i abvinavačanych, ekstremisckich materyjałaŭ u častcy prapahandy ahresiŭnych, hvałtoŭnych dziejańniaŭ, nakiravanych suprać orhanaŭ pravaparadku; zaklikaŭ, jakija padachvočvajuć hramadzianaŭ da ździajśnieńnia supraćpraŭnych dziejańniaŭ, masavych biesparadkaŭ; abraźlivych i pahardlivych najmieńniaŭ ludziej pa etničnaj prykmiecie. Pry hetym raspaŭsiudžanyja ŭ sietcy Internet materyjały ŭtrymlivajuć nacysckuju simvoliku i atrybutyku, vykazvańni, jakija abražajuć vieteranaŭ Vialikaj Ajčynnaj vajny. Pavodle vysnovaŭ zaklučeńnia respublikanskaj ekśpiertnaj kamisii Ministerstva infarmacyi Respubliki Biełaruś raspaŭsiudžanyja ŭ sietcy Internet materyjały ŭtrymlivajuć prykmiety prajavy ekstremizmu i rašeńniem suda Centralnaha rajona horada Minska pryznanyja ekstremisckimi», — havorycca ŭ pres-relizie.
Pry hetym niezrazumieła, na čyjoj mienavita kamputarnaj technicy byli vyjaŭlenyja ekstremisckaj materyjały, kali pieratrusy i kanfiskacyja adbyvalisia na piaci kvaterach (u tym liku i na kvaterach baćkoŭ zatrymanych), i na jakoje mienavita rašeńnie suda Centralnaha rajana spasyłajecca Śledčy kamitet, kali nichto ź fihurantaŭ pa spravie nie ŭ kursie padobnych rašeńniaŭ.
Akramia taho, Śledčy kamitet adznačaje, što «pravodziacca śledčyja dziejańni, nakiravanyja na pravierku faktaŭ dziejnaści hrupy, jakija źmiaščajuć prykmiety raspalvańnia rasavaj, nacyjanalnaj abo relihijnaj varožaści abo roźni, kančatkovy vyvad pa jakich budzie zrobleny paśla zaklučeńnia psichołaha-linhvistyčnaj ekśpiertyzy».
Jarasłava Uljanienkava, jaki prachodzić pa spravie ŭ statusie padazravanaha i byŭ adpuščany pad padpisku ab niavyjeździe, nichto nie aznajomiŭ z pastanovaj ab pryznačeńni psichołaha-linhvistyčnaj ekśpiertyzy. Jon užo nakiravaŭ chadajnictva kiraŭniku śledčaj hrupy Ahafonavu A. D., u jakim prosić aznajomić jaho z takoj pastanovaj, kali ekśpiertyza pryznačałasia ŭ chodzie praviadzieńnia papiaredniaha rasśledavańnia pa ŭkazanaj kryminalnaj spravie.
Siarod inšaha, Śledčy kamitet daje i niekarektnuju acenku asobam fihurantaŭ, adznačajučy, što niekatoryja ź ich pryciahvalisia da administracyjnaj adkaznaści, u niadaŭnim časie źmianili svaje proźviščy, dvoje pierajechali ŭ Minsku i pražyvali na zdymnaj kvatery, što nie adnosicca da spravy. A kanfiskavanyja pradmiety ŭ zatrymanych — pnieŭmatyčny pistalet, bałakłavy, nalepki — nie zabaronieny zakanadaŭstvam Biełarusi, nie dakazana ich vykarystańnie ŭ metach ździajśnieńnia złačynnych dziejańniaŭ. Adnak, styl napisańnia naviny Śledčym kamitetam naŭmysna stvaraje niehatyŭny vobraz chłopcaŭ, parušajučy ich prezumpcyju nievinavataści.
Maci Maksima Piakarskaha ad adčaju ŭžo źviarnułasia da prezidenta A. H. Łukašenki z prośbaj pamiłavać M. Piakarskaha, V. Žaromskaha i V. Kasinierava na etapie pradjaŭleńnia abvinavačvańnia i nie davać padstavy razrastacca dalejšym dziejańniam vakoł situacyi, jakaja skłałasia.
Nahadajem, 11 žniŭnia piaciora chłopcaŭ byli žorstka zatrymanyja pa padazreńni va ŭdziele pa troch kryminalnych spravach: naniasieńniu biełaruska-moŭnych hrafici «Biełaruś maje być biełaruskaj» i «Revalucyja śviadomaści, jana ŭžo idzie…», a taksama zapeckvańniu farbaj sacyjalnaha bihborda z vyjavami supracoŭnikaŭ milicyi.
20 žniŭnia Śledčy kamitet pradjaviŭ abvinavačvańni Maksimu Piakarskamu i Vadzimu Žaromskamu pa č. 2 art. 339 Kryminalnaha kodeksu – «Chulihanstva, ździejśnienaje hrupaj asobaŭ». Ciapier chłopcy znachodziacca ŭ SIZA-1.
Pravaabarončy centr «Viasna» užo vystupiŭ z zajavaj nakont situacyi, jakaja skłałasia, i patrabuje nieadkładnaha vyzvaleńnia z-pad varty Viačasłava Kasinierava, Maksima Piakarskaha i Vadzima Žaromskaha.
