Minskaje «Dynama» praviało pieršy matč raŭnda płej-of futbolnaj Lihi Jeŭropy. U Breście družyna Vuka Rašaviča prymała aŭstryjski «Red Buł».
Zrešty, tak hości nazyvajucca tolki na ŭnutranaj arenie, a ŭ jeŭrakubkach im davodzicca vystupać pad nazvaj FK «Zalcburh», kab nie było rekłamy. Kali «Dynama» abydzie aŭstryjcaŭ, to druhi hod zapar zmoža hulać u hrupavym etapie Lihi Jeŭropy.
U Breście dušeŭna. Mabyć, heta sapraŭdy aptymalnaje miesca dla praviadzieńnia dynamaŭskich jeŭrakubkavych matčaŭ. Dabradušnaja publika zładziła na trybunach sapraŭdny bitok. Takoha b dakładna nie było ŭ Barysavie, dzie raśpieščanaja publika nie nadta šanuje prysutnaściu navat matčy zbornaj, a što tady kazać pra kankurentaŭ z «Dynama». Pra depresiŭnuju atmaśfieru minskaha «Traktara» ŭžo stolki havorana, što niama sensu paŭtaracca. A ŭ Bieraści publika nie raśpieščanaja futbolnymi vidoviščami i ciopłyja siabroŭskija adnosiny pamiž kłubami šmat na što ŭpłyvajuć.
Plus da ŭsiaho karcinu vydatnaha futbolnaha viečara dapaŭniała łahodnaje letniaje nadvorje. Nie było śpiakotna, ale i nie choładna ŭ majcy i šortach. Z trybun stadyjona bačny i carkva, i kaścioł. Navat milicyja padałasia bolš vietlivaj, čym u Minsku ci Barysavie.
Ludzi, što zapoŭnili stadyjon zaŭzieli samaaddana i pryhoža. I heta pry tym, što znoŭ nie było fanackaha siektara, jaki praciahvaje bajkatavać hulni.
Admietna, što afišy da hulni dynamaŭcy aformili pa-biełarusku – «Zastaŭsia apošni ryvok». U hetym płanie ŭ minčukoŭ jość čamu pavučycca.
Što tyčycca supiernika, to «Red Buł» – heta dziejny čempijon Aŭstryi. Kamanda jašče niadaŭna hulała ŭ Lizie čempijonaŭ. I pačatak byŭ vielmi abnadziejvajučy – pieramoha ŭ chatniaj hulni nad šviedskim «Malmio» ź likam 2:0. Adnak u haściach aŭstryjcy byli bityja 0:3. Uvohule kamanda z Zalcburha nie vielmi ŭpeŭniena pačała siezon nie tolki na jeŭraarenie, ale i va ŭnutranym pieršynstvie.
Usio heta stvarała spryjalnyja ŭmovy dla minčukoŭ. Tym bolš, «Dynama» ciapier nabrała cudoŭnuju chadu ŭ čempijanacie Biełarusi, da BATE zastajecca ŭsiaho try punkty. Ź inšaha boku, pavodle futbolnych sielekcyjanieraŭ, sumarnaja cana «Dynama» bolš čym u čatyry razy nižejšaja za «Red Buł».
Skažam ščyra, što ŭ pieršym tajmie hledačy nazirali dastatkova panyły futboł. Kamandy hulali biez varot, heta značyć zusim nie turbavali hałkipieraŭ. Było šmat baraćby, ale da ŭdaraŭ sprava tak i nie dachodziła. Tolki naprykancy tajma Fatas Biečyraj moh adkryvać lik, adnak nie pavieryŭ svajmu ščaściu, što miač prylacieŭ da jaho pavodle ŭsich praviłaŭ i nijakim afsajdam tam nie pachła.
A ŭ pačatku druhoha tajma «Dynama» ŭsio ž zmahło zabić. Heta sierb Nienad Adamavič, jaki litaralna pierad hetym źjaviŭsia na poli, prajšoŭ pa levym fłanzie dy naviesiŭ u štrafnuju. Fatas Biečyraj praskočyŭ mima miača. Zatoje na miescy akazaŭsia Hleb Rasadkin, małady forvard hałavoj nakiravaŭ miač u varoty «Red Buła».
U Rasadkina ŭvachodzić za praviła zabivać važnyja dla «Dynama» hały. Dziesiać dzion tamu mienavita jon prynios pieramohu svajmu kłubu ŭ hulni z BATE.
Paśla hetaha «Red Buł» byŭ vymušany iści napierad. U «Dynama» ž źjaŭlałasia mahčymaść dziejničać na kontratakach. U cełym kancoŭku hulni vastrej praviali hości. Niekalki razoŭ hledačy z zachapleńniem hukali proźvišča biełaruskaha bramnika Hutara. Ale skazać, što aŭstryjcy byli vielmi blizkija da hoła nielha.
A ŭ kampiensavany arbitram čas Nienad Adamavič padvoiŭ pieravahu – 2:0.
Kali padvodzić rysu da hulni, to minskaje «Dynama» zmahło vycisnuć praktyčna ŭsio z hetaha matča. Suchaja pieramoha pakidaje pierad kamandaj vydatnyja šancy na praciah baraćby. Pa pieršaj hulni ciažka skazać za košt čaho «Red Buł» źbirajecca prachodzić dalej.
Matč u adkaz projdzie 27 žniŭnia ŭ Zalcburhu.
