Piać vypusknikoŭ bakałaŭryjatu Jeŭrapiejskaha humanitarnaha ŭniviersiteta (EHU) atrymali prestyžnuju Dziaržaŭnuju stypiendyju na navučańnie ŭ mahistratury. Pra heta paviedamiła Ministerstva aśviety i navuki Litvy ŭ žniŭni.
Ministerstva štohod prapanuje hramadzianam krain Uschodniaha partniorstva i Centralnaj Azii paŭdzielničać u konkursie na atrymańnie finansavaj padtrymki dla navučańnia ŭ mahistratury.
«Stypiendyja ad Litoŭskaha ŭrada, jakuju ja atrymała, vyrašaje absalutna ŭsie finansavyja pytańni, źviazanyja z mahistraturaj: hrant pakryvaje košt navučańnia, vypłačvajecca štomiesiačnaja stypiendyja. Ja vielmi radaja, što isnujuć padobnyja prahramy, jakija dapamahajuć matyvavanym studentam ź Biełarusi dasiahać svaich metaŭ. Mnie vielmi pryjemna, što siarod stypiendyjataŭ Litoŭskaha ŭrada, akramia mianie, jość jašče i inšyja studenty EHU: na maju dumku, heta śviedčyć pra dobry ŭzrovień adukacyi našych vypusknikoŭ», – ciešycca Jana Laškovič, studentka mahistarskaj prahramy EHU «Histaryčnaja i kulturnaja spadčyna».
Konkurs pa pradastaŭleńni Dziaržaŭnych stypiendyj maje na mecie pryciahnieńnie hramadzian krain Uschodniaha partniorstva i Centralnaj Azii dla navučańnia na mahistarskich prahramach va ŭniviersitetach Litvy. Zajaŭki adbirajucca pavodle kryteryjaŭ akademičnaj paśpiachovaści, navukovych i tvorčych dasiahnieńniaŭ, vałodańnia anhlijskaj movaj, a taksama matyvacyi budučych mahistrantaŭ.
«Atrymańnie hranta sa stypiendyjaj – heta vialiki honar, tamu što taki konkurs dazvalaje pa-sapraŭdnamu, abjektyŭna acanić svaje zdolnaści i dobryja jakaści, zrazumieć, čaho ty nasamreč varty. Dla mianie hetaja stypiendyja taksama vyrašyła surjoznaje pytańnie pra sumiaščeńnie navučańnia i pracy. Jak mnie zdajecca, jaki b talenavity i pracazdolny ty ni byŭ, možna albo vydatna vučycca, albo dobra zarablać. Spadziajusia, što mahistratura ŭ EHU dapamoža mnie abjadnać maje raniejšyja navyki i intaresy, i zaraz dziakujučy stypiendyi ja zmahu zasiarodzicca na pahłybleńni svaich akademičnych viedaŭ, na tvorčaści, zmahu navat dazvolić sabie niečuvanuju raskošu dla niadaŭniaha vypusknika: abirać tuju pracu, jakaja mnie cikavaja», – kaža Ksienija Štalenkova, studentka mahistarskaj prahramy EHU «Kulturnyja daśledavańni».
Sioleta łaŭreatami Dziaržaŭnaj stypiendyi, jakaja całkam pakryvaje košt navučańnia ŭ mahistratury, a taksama daje štomiesiačnuju stypiendyju na čas navučańnia, stali 5 vypusknikoŭ bakałaŭrskich prahram EHU 2015:
- Andrej Vajtovič, student mahistarskaj prahramy EHU «Publičnaja palityka»;
- Jana Laškovič, studentka mahistarskaj prahramy EHU «Histaryčnaja i kulturnaja spadčyna»;
- Lizavieta Novikava, studentka prahramy EHU «Mižnarodnaje prava i prava Jeŭrapiejskaha sajuza»;
- Ksienija Štalenkova, studentka prahramy EHU «Kulturnyja daśledavańni»;
- Alaksiej Maściapanaŭ, student Jurydyčnaha fakulteta Vilenskaha ŭniviersiteta.
