Ukrainskaja inviestycyjna-bankaŭskaja kampanija Jaspen Capital Partners razhladaje mahčymaść padačy pazovu ŭ Łondanski sud na biełaruski šmatprofilny chołdynh «Trajpł». Niadaŭni kanflikt Jaspen Capital Partners vakoł ździełki, u jakoj fihuravali baćka i syn Japryncavy, moža razharecca z novaj siłaj.
«Nakolki my viedajem, abodva Japryncavy zatrymanyja i, pa našaj infarmacyi, častkova heta moža być źviazana i z našaj spravaj», — skazaŭ u kamientary Tut.by adzin z zasnavalnikaŭ «Džaspen Kepitał Partners» Piotr Spatar.
«Na hety momant kanflikt pamiž nami nie vyrašany. Bolš za toje, uzhodnieny hrafik płaciažoŭ parušany. A kampanija «Trajpł» u asobie Juryja Alaksandraviča [Juryja Čyža, asnoŭnaha ŭładalnika šmatprofilnaha chołdynhu «Trajpł»] admaŭlajecca ad svaich abaviazacielstvaŭ pa tych damovach, jakija byli padpisanyja Uładzimiram Japryncavym», — adznačyŭ jon.
Pradstaŭnik Jaspen Capital Partners paviedamiŭ, što ŭ bližejšy miesiac kampanija padaść u dačynieńni da «Trajpła» pazoŭ u Łondanski sud. «Trajpł» nie pryznaje, ale nasamreč pavodle anhlijskaha prava abaviazacielstvy pierad nami ŭ ich jość», — upeŭnieny Spatar.
Sutnaść kanfliktnaj situacyi zaklučałasia ŭ nastupnym.
U lutym 2014 Jaspen Capital Partners sumiesna z zarehistravanaj u Šatłandyi kampanijaj Maratoni padpisała kantrakt z Edena Investments (miesca dysłakacyi Brytanskija Virhinskija vyspy) na pastaŭku 2 tys. ton dyzielnaha paliva na ahulnuju sumu bolš za 1,6 młn dalaraŭ. Ździełka była harantavanaja hrupaj kampanij «Trajpł» z dapamohaj padpisańnia dakumientaŭ ad asoby namieśnika hiendyrektara Uładzimira Japryncava, syn jakoha Kaźbiek źjaŭlajecca adnym z ułaśnikaŭ Edena Investments. «Da hetaha my nikoli nie pracavali z «Trajpłam» ci inšymi biełaruskimi kampanijami, ale naš partnior z Maratoni pracavaŭ, jaki nas i paznajomiŭ z Kaźbiekam Japryncavym, Alaksandram Arabijanam i Isaakam Papadopułasam, jakija pradstaŭlali intaresy «Trajpła», — tłumačyŭ Spatar.
Pavodle jaho słoŭ, «my ŭstupili ŭ hetuju ździełku, bo jana była harantavanaja kampanijaj «Trajpł», jakaja naležyć Juryju Čyžu, bo jaho status u Biełarusi jak biznesmena i kiraŭnika kampanii pa handli palivam vyklikaŭ naš davier».
Zasnavalnikam šatłandskaj kampanii Maratoni nazyvajecca ŭkrainski biznesmen Vasil Hałavanič, jaki zajmajecca, u pryvatnaści, aptovymi pastaŭkami dyzielnaha paliva i inšych śvietłych naftapraduktaŭ. «Biełaruskaje paliva my płanavali pradavać va Ukrainie siarod aptovych klijentaŭ (bujnych sielskahaspadarčych i inšych kampanij, ź jakimi ŭ nas jość dziełavyja adnosiny). Cana, jakuju dla Maratoni i nas prapanavała Edena/»Trajpł» na ŭmovach pieradapłaty, była cikavaja, a ryzyki vyhladali nievysokimi z-za harantyj kampanii «Trajpł». Tamu my pryniali ŭdzieł u dadzienaj tranzakcyi», — skazaŭ Spatar.
Adnak za minuły čas prapłočanaja salarka tak i nie dajechała va Ukrainu.
Ale Edena Investments nie viarnuła Jaspen i Maratoni atrymanyja hrošy. Bolš za toje, pa słovach Spatara, «nijakich istotnych krokaŭ z boku siamji Japryncava, ich biznes-partnioraŭ abo TAA «Trajpł» pa viartańni bolš čym 1,6 młn dalaraŭ nie było pryniata».
Jaspen Capital ničoha nie zastavałasia, jak pačać rychtavać dakumienty dla zvarotu ŭ sud.
Paśla taho jak heta historyja stała zdabytkam hramadskaści, abodva baki zajavili ab žadańni vyrašyć kanflikt mirnym šlacham. U červieni Kaźbiek Japryncaŭ. napisaŭ tut.by pra toje, što hrafik pahašeńnia zapazyčanaści ŭzhodnieny.
Uładzimir Japryncaŭ, saŭładalnik chołdynhu «Trajpł», zajmaje 19-je miesca ŭ topie samych upłyvovych biełaruskich biźniesmienaŭ pa viersii «Ježiednievnika». U minułym jon viadomy spartsmien, zasłužany majstar sportu SSSR pa samba, zasłužany trenier Biełarusi, 4-kratny čempijon śvietu pa samba, 3-razovy čempijon Jeŭropy pa samba, uładalnik Kubka śvietu.
