Nursułtan Nazarbajeŭ. Fota: D.Abramaŭ, vedomosti.ru
Nizkija ceny na naftu i mietały, słaby popyt na ekspartnyja tavary z boku Rasii i Kitaja kiepska adabjucca na ekanomicy krainy, ličyć prezident Kazachstana Nursułtan Nazarbajeŭ. «Zychodziačy z novych ekanamičnych realij, nieabchodna adaptavacca da koštaŭ na naftu na ŭzroŭni $ 30-40 za baral», — havorycca ŭ materyjałach siońniašniaj narady pa sistemnych mieram ekanamičnaj palityki.
«U papiarednija hady my šmat budavali, pavialičvali štaty i ŭzrovień zarabotnaj płaty, — kanstatavaŭ Nazarbajeŭ. — Adnak ciapier (…) nieabchodna ŭvieści maratoryj na roznyja inicyjatyvy da 2018 hoda. Heta vymušanaja miera, vyklikanaja siońniašniaj realnaściu».
Kiraŭnik dziaržavy nazvaŭ try niehatyŭnyja dla ekanomiki Kazachstana faktary.
«Pa-pieršaje, nizkija ceny na naftu i mietały, na dumku ekśpiertaŭ, mohuć zachavacca na praciahu piaci hadoŭ. Pa-druhoje, dostup krain, jakija raźvivajucca da inviestycyj i kapitału budzie značna abmiežavany. I pa-treciaje, ściskajecca rynak zbytu kazachstanskaj pradukcyi praz słaby popyt z boku našych asnoŭnych partnioraŭ, pierš za ŭsio Rasii i Kitaja», — skazaŭ Nazarbajeŭ, słovy jakoha pryvodziacca ŭ paviedamleńni.
Ministr finansaŭ Kazachstana Bachyt Sułtanaŭ raspavioŭ, što za pieršaje paŭhodździe «cana na naftu skaraciłasia ŭ dva razy, u suviazi z čym na tracinu źnizilisia pastupleńnia ad ekspartnaj mytnaj pošliny. U vyniku dachodnaść biudžetu pamienšyłasia na 22%».
Ministr pa inviestycyjach i raźvićciu Asiet Isiekiešaŭ skazaŭ, što Kazachstan skarocić lik pryjarytetnych siektaraŭ ekanomiki. «My majem namier padtrymlivać tolki mocnyja pradpryjemstvy, jakija ŭ jakaści partnioraŭ majuć albo transnacyjanalnuju kampaniju, albo kazachstanskija kampanii-čempijony.
My bačym, što bolš mocnyja pradpryjemstvy praciahvajuć pracu, u toj čas jak pradpryjemstvy, jakija nie zajmalisia madernizacyjaj, stanuć bankrutami, što budzie ŭličana ŭ našaj prahramie zaniataści», — skazaŭ ministr pa inviestycyjach i raźvićciu.
