19 žniŭnia Minski abłasny sud vynies pryhavor pa spravie ab trajnym zabojstvie ŭ Mačuliščach (Minski rajon).
Raniej nieadnarazova sudzimy 30-hadovy žychar Minskaha rajona pryhavorany da pažyćciovaha źniavoleńnia z adbyvańniem pakarańnia ŭ papraŭčaj kałonii asobaha režymu. Abvinavačvanamu pryznačany miery prymusovaj biaśpieki i lačeńnia ad ałkahalizmu ŭ miescy adbyvańnia pakarańnia.
Dziaržabvinavačańnie zapytvała ŭ suda pakarańnie ŭ vyhladzie śmiarotnaj kary. Mahčyma, źmiakčeńnie pakarańnia tłumačycca ŭ pryvatnaj pastanovie suda.
U im źviartajecca ŭvaha načalnikaŭ USK pa Minskaj vobłaści i Minskaha RUUS na parušeńni pry praviadzieńni rasśledavańnia kryminalna-pracesualnaha zakanadaŭstva.
Pavodle danych śledstva, abvinavačvany vyzvaliŭsia ź miescaŭ pazbaŭleńnia voli ŭ kancy śniežnia 2013 hoda. 1 listapada 2014 hoda zajšoŭ u dom da susieda 1965 hoda naradžeńnia, dzie sumiesna ź im i jaho sužycielkaj raśpivaŭ śpirtnyja napoi.
Padčas raptoŭnaj svarki nanios haspadaru doma i jaho sužycielcy šmatlikija ŭdary nažom u vobłaść tvaru i šyi, pryčyniŭšy im cialesnyja paškodžańni, jakija paciahnuli śmierć. Kab zamieści ślady zabojstva, padpaliŭ dom.
U vyniku pažaru byŭ źniščany i paškodžany budynak i jaho majomaść ahulnym koštam bolš jak 90 młn. rubloŭ.
Pakidajučy miesca złačynstva, abvinavačvany ŭ dvary doma paciarpiełych sustreŭ 57-hadovaha adnaviaskoŭca. Kab pazbavicca ad śviedki, śpichnuŭ jaho ŭ bietonnuju jamu hłybinioj bolš jak dva mietry.
U vyniku padzieńnia paciarpiełamu byli naniesienyja šmatlikija ciažkija cialesnyja paškodžańni, ad jakich praź niekalki tydniaŭ jon pamior u balnicy.
Za naŭmysnaje zabojstva dźviuch asob, učynienaje z asablivaj žorstkaściu, a taksama za naŭmysnaje zabojstva čałavieka z metaj utaić inšaje złačynstva, učynienaje asobaj, jakaja raniej učyniła zabojstva, sudom mahło być pryznačana pakarańnie ŭ vyhladzie pazbaŭleńnia voli terminam da 25 hadoŭ, ci pažyćciovaje źniavoleńnie, ci śmiarotnaja kara. Dziejnym kryminalnym zakanadaŭstvam za naŭmysnaje źniščeńnie majomaści, učynienaje ahulnaniebiaśpiečnym sposabam, jakoje paciahnuła pryčynieńnie škody ŭ bujnym pamiery, praduhledžana pakarańnie ŭ vyhladzie pazbaŭleńnia voli terminam da 10 hadoŭ.
Papiaredniaje rasśledavańnie kryminalnaj spravy pravodziła ŭpraŭleńnie Śledčaha kamiteta pa Minskaj vobłaści.
Dziaržabvinavačańnie nie vyklučaje apratestavańnia pryhavoru. Abvinavačvany moža abskardzić rašeńnie Minskaha abłasnoha suda ŭ Viarchoŭnym sudzie.
