Niadaŭna pretendent na pasadu prezidenta Biełarusi Viktar Ciareščanka skazaŭ radyjo «Svaboda», što ŭ jaho padtrymku, nibyta, udałosia sabrać 128 tysiač podpisaŭ. I, śćviardžaŭ jon, pośpiech dasiahnuty praz toje, što zborščykam płociać hrošy. «Naša Niva» pacikaviłasia ŭ Viktara Ciareščanki, ab jakoj mienavita sumie idzie havorka. Ale ŭ adkaz pretendent razam z načalnikam ułasnaha štaba ŭzialisia abviarhać adzin adnaho, pieradajučy trubku.
«Ja, pa ščyraści, nie viedaju, hetymi pytańniami zajmajecca Aleh Piatrovič [nač. štaba Ciareščanki Nieściarkoŭ — NN], ja pieradam jamu trubku», — adrazu saskočyŭ Viktar Ciareščanka, pieradaŭšy słuchaŭku svajmu paplečniku.
Atrymaŭšy trubu, Aleh Piatrovič niečakana… abvierh słovy svajho šefa.
«Jak havorycca, kali kaścior nie haryć, to tudy treba štości padkidvać. Tak i tut, — pačaŭ Aleh Piatrovič, — heta było zroblena dla peŭnaj intryhi. Ale kali chtości ŭsurjoz kaža, što my tam płocim… Heta nie tak. Ja vam jašče raz zajaŭlaju — my nikomu nie płacim».
Pavodle načalnika štaba Ciareščanki, jany niasuć tolki techničnyja vydatki: na paliva, telefony, ježu dla zborščykaŭ.
A vałanciory, skazaŭ načalnik štaba, prychodziać da ich pa pierakanańni, «bo daviarajuć».
Pavodle źviestak Centravybarkam, na siońnia ŭ pieradvybarčym fondzie kandydata Ciareščanki krychu bolej za 9 miljonaŭ rubloŭ. Kali ŭličyć, što ŭ inicyjatyŭnaj hrupie 916 čałaviek i vieryć sp.Nieścierkovu, to na kožnaha ź ich prypadaje trochi mienš, čym pa 10 tysiač rubloŭ na ježu, paliva i telefon.
«A toje, što Viktar Ivanavič [Ciareščanka] skazaŭ, skazaŭ… Jon sam viedaje, što jon skazaŭ. Jon heta admysłova skazaŭ, kab intryhu stvaryć», — reziumavaŭ Aleh Piatrovič.
