Milicyja ŭmiašałasia ŭ abrad chryščeńnia, jaki pravodzili prychadžanie carkvy chryścijan viery jevanhielskaj «Błahadać» 15 žniŭnia na centralnym plažy Smalavickaha vadaschovišča (Minskaja vobłaść). Pra heta paviedamiŭ adkazny sakratar arhkamiteta pa stvareńni partyi «Biełaruskaja chryścijanskaja demakratyja» Dzianis Sadoŭski, jaki staŭ śviedkam zdareńnia.
Pavodle jaho słoŭ, 15 žniŭnia niekalki dziasiatkaŭ pratestantaŭ razam z pastaram mieli namier pravieści tainstva chryščeńnia na bierazie Smalavickaha vadaschovišča. Akramia ich tam prysutničała piać čałaviek, jakija pryjšli adpačyć.
Blizka paŭdnia da viernikaŭ padyšoŭ milicyjanier. Paśla vyśviatleńnia situacyi jon skłaŭ u dačynieńni da pastara carkvy pratakoł ab administracyjnym parušeńni na padstavie art. 23.34 KoAP (parušeńnie paradku arhanizacyi abo praviadzieńnia masavych mierapryjemstvaŭ) i mieŭ namier advieźci jaho ŭ aporny punkt.
Milicyjanier źviazaŭsia pa racyi z kalehami, i nieŭzabavie na bierazie źjavilisia jašče troje supracoŭnikaŭ pravaachoŭnych orhanaŭ. Pavodle słoŭ Sadoŭskaha, vierahodna, heta było miascovaje milicejskaje načalstva. Milicyjaniery pahutaryli z pastaram i dazvolili pravodzić chryščeńnie, paprasiŭšy viernikaŭ tolki adyści krychu dalej ad centralnaha plaža.
Prychadžanie «Błahadaci» addalilisia prykładna na paŭkiłamietra ad miesca, dzie ŭźnik kanflikt, i abrad atrymaŭ praciah. Milicyjaniery nazirali za im zdalok.
«Adzinaje, što zastałosia niezrazumiełym, heta toje, jaki budzie los składzienaha na pastara pratakoła», — skazaŭ Sadoŭski.
