Pradastaŭleńnie prava biaspłatnaha prajezdu pa płatnych aŭtamabilnych darohach Biełarusi dla aŭtamabilaŭ z Danieckaj i Łuhanskaj abłaściej tyčycca tolki tych hramadzian, jakija vykazali žadańnie pierajechać u Biełaruś na pieryjad hetaj ciažkaj situacyi. Takuju zajavu zrabiŭ ministr zamiežnych spraŭ Uładzimir Makiej na bryfinhu ŭ Kijevie 12 žniŭnia.
«Heta tyčycca tolki biežancaŭ, jakich u nas naličvajecca kala 100 tys. čałaviek, — skazaŭ Makiej, słovy jakoha pryvodzić pres-słužba źniešniepalityčnaha viedamstva. — Ale heta ni ŭ jakoj miery nie aznačaje niejkaha asobnaha pryznańnia Danieckaj i Łuhanskaj abłaściej u jakaści asobnych niejkich respublik. Prezident Biełarusi nakont hetaha vykazaŭsia adnaznačna: i Danieckaja, i Łuhanskaja vobłaści byli, jość i buduć u składzie Ukrainy. Hetym usio skazana».
Jak paviedamlałasia raniej, 10 žniŭnia Alaksandr Łukašenka ŭnios źmianieńni i dapaŭnieńni ŭ niekatoryja ŭkazy pa pytańniach funkcyjanavańnia sistemy źbirańnia płaty za prajezd pa płatnych aŭtamabilnych darohach. U pryvatnaści, ad płaty za prajezd vyzvalajucca karystalniki, jakija vykarystoŭvajuć transpartnyja srodki, zarehistravanyja na terytoryi Danieckaj i Łuhanskaj abłaściej Ukrainy, z technična dapuščalnaj ahulnaj masaj nie bolš čym 3,5 tony, i pryčepy, jakija imi buksujucca. Niekatoryja ŭkrainskija ŚMI vykazali mierkavańnie, što razmova idzie ab transpartnych srodkach, jakija majuć rehistracyju t.z. DNR i ŁNR.
Pytańnie Makieju, zadadzienaje telekanałam «112 Ukraina», hučała mienavita ŭ takim kantekście: «Pytańnie ab infarmacyi, jakaja źjaviłasia ŭčora, što płatnyja darohi ŭ Biełarusi buduć adkrytyja i biaspłatnyja dla prajezdu transpartnych srodkaŭ t.z. ŁNR i DNR. Što heta aznačaje: pryznańnie samaabvieščanych respublik abo niejkija ŭstupki Rasii? Jak možna rastłumačyć takoje rašeńnie?»
