ABSIE sa žniŭnia minułaha hoda zafiksavała bolš za 20 mašyn z nadpisam «hruz 200», jakija pierasiakali rasiejska-ŭkrainskuju miažu, paviedamlaje RIA Novosti sa spasyłkaj na kiraŭnika misii ŭ Rastoŭskaj vobłaści Pola Pikara.
AP
«Mašyny z nadpisam «hruz 200» prajazdžajuć praź miažu, albo prosta ličby «200». Usiaho za hod prajechała 21 takaja truna», — skazaŭ Pikar na pres-kanfierencyi.
Pikar adznačyŭ, što supracoŭniki ABSIE dakładna nie viedajuć, što ŭ ich znachodziłasia, bo hruzaviki jechali začynienymi. «Hazeli» z trunami prajazdžali jak u bok Ukrainy, tak i ŭ bok Rasii, dadaŭ jon.
U apošniaj spravazdačy śpiecyjalnaj manitorynhavaj misii ABSIE ad 2 žniŭnia havorycca ab mahčymym znachodžańni ŭ Danbasie «słužačych pavietrana-desantnaj bryhady z Arenburha». Aŭtary dakładu spasyłajucca na zajavu zbrojnaha achoŭnika składa z bojeprypasami na terytoryi samaabvieščanaj Danieckaj narodnaj respubliki, jaki zajaviŭ, što razam ź inšymi achoŭnikami słužyć u 16-j pavietrana-desantnaj bryhadzie z Arenburha. Pry hetym, adznačajecca ŭ spravazdačy, nijakich apaznavalnych znakaŭ na formie mužčyny nie było.
U Kramli paabiacali pravieryć hetuju infarmacyju, adznačyŭšy, što ŭ adras Rasii nieadnarazova hučali «hałasłoŭnyja abvinavačvańni» u adpraŭcy ŭ Danbas vajennasłužačych, ale «kožny raz na pavierku vyśviatlałasia, što ni pra što kankretnaje havorka nie idzie». Maskva admaŭlaje luby ŭdzieł Uzbrojenych sił RF u kanflikcie na ŭschodzie Ukrainy.
