Aleś Puškin sustrakaje 50-hodździe ŭ rodnaj vioscy Bobr Krupskaha rajona. Kala doma nakrytyja stały, i ceły dzień prymaje haściej i vinšavańni. Jak na karcinach Pirasmani — zastolle, tosty.
Da takoj kruhłaj daty Puškin padyšoŭ ź vialikim bahažom — čaćviora dziaciej (try dački i syn), adzin unuk. Unuka padaryła dačka Hanna. Chłopčyk naradziŭsia 1 žniŭnia. Imia jamu jašče nie dali.
Svaim vialikim nabytkam jon nazyvaje i svaje karciny, vystavy… Kaža, što kali niechta nie viedaje jaho pałotnaŭ, to pra pierformans z tačkaj hnoju da rezidencyi Łukašenki čuli. Heta było ŭ 1999-m. Mastak adznačaje, što paśla taho pierformansu maci jaho pabiła pałkaj: maŭlaŭ, syn nie ŭśviedamlaŭ, što ź im mahli za toje zrabić. A jana pieražyvała.
Kali ž u 1989 hodzie Puškin pravioŭ palityčny pierformans da 71 hadaviny abviaščeńnia BNR i jaho asudzili na ŭmoŭny termin, maci strymana reahavała. A voś baćka, jaki adsiedzieŭ u łahiery, mocna byŭ uražany: za taki ŭčynak syna nie tolki nie pasadzili ŭ turmu, ale i pakinuli vučycca ŭ Akademii mastactvaŭ.
Najbolšym svaim mastackim tvoram Puškin ličyć rośpis carkvy ŭ Babry. Chacia freska z sudom Božym pryniesła Puškinu šmat niepryjemnaściaŭ. Carkva ŭ 2011 zhareła. Ciapier, praŭda, chram adnavili. I mastak budzie źviartacca da jepiskapa, kab jamu znoŭ dazvolili jaho raśpisać.
Sam Aleś Puškin nazyvaje vialikaj padziejaj dla rodnaj vioski svajo naradžeńnie. Za 500-hadovuju historyju Babra heta adzinkavy vypadak, kab viaskovy chłopčyk staŭ mastakom, viarnuŭsia ŭ Bobr i raśpisaŭ carkvu.
Padčas vučoby ŭ Akademii mastactvaŭ jaho zabrali ŭ armiju. Kaža, što kali byli ŭ Taškiencie ŭžo, paviedamili im pra vylet u Afhanistan na vajnu. Jon byŭ u viertalotnym pałku — absłuhoŭvaŭ viertaloty. Niepasredna ŭ bajavych dziejańniach nie ŭdzielničaŭ. Tamu i strašna tam nie było. Prynamsi, pra śmierć nie zadumvaŭsia. Kaniečnie, byli abstreły. Uraziła śmierć sałdata: adbyŭsia samastreł i chłopiec pamiraŭ na vačach u Puškina. Mastak zapomniŭ jaho vočy, poŭnyja žachu.
Puškin pryhadvaje publikacyju ŭ «Komsomolskoj pravdie», u jakoj aŭtarka razvažała nad dvuma varyjantami dla mastaka ŭ budučym. Pa pieršym, Puškin pryznany ŭ Biełarusi, jaho karciny visiać u halerejach, pra jaho pišuć aficyjnyja haziety. Pa druhim, jon biedny, źbiraje kala carkvy miłaścinu. Ni adzin prahnoz nie spraŭdziŭsia.
U 1997 hodzie ŭ Alesia Puškina zabrali mastackuju halereju ŭ Viciebsku. I z taho času jon žyvie ŭ Babry. Tut pachavany jaho baćki i dziady. I jaho hetaja enierhietyka siłkuje. Tut žyvie z žonkaj Janinaj i małodšymi dziećmi Mikołam i Marylaj. Tut jon stvaryŭ svaju biełaruskamoŭnuju siamju.
