Tvorčy viciebski duet «StreetSkills» zrabiŭ padarunak Viciebsku — novaje hrafici. Na im — vyjava Marka Šahała.
Za asnovu malunka Hleb Kaštanaŭ i Jan Kuźmin uziali fotazdymak majstra. Jahonaja vyjava razam z aŭtohrafam mastaka źjaviłasia na transfarmatarnaj budcy ŭ adnym z dvaroŭ pa vulicy Suvorava.
«My kiravalisia tym, što pablizu znachodzicca art-centar Marka Šahała. Napačatku abrali inšaje miesca — na budynku pa vulicy Tałstoha. Volnaja ścienka hetaha budynka tak i «prasiłasia», kab u centry horadu na bierazie Vićby źjaviŭsia partret najviadomiejšaj asoby, jakaja prasłaviła Viciebsk na ŭvieś śviet. Adnak hetuju ideju nie ŭzhadnili ŭ harvykankamie. Vokny ŭstanovy byli b jakraz nasuprać… Tady my vyrašyli, što namalujem tut. Miascovyja žychary duža zacikavilisia našaj pracaj, prynieśli nam leśvicu, kab było zručniej. Pracujem my ŭžo treci dzień, i da viečara 25 lipienia miarkujem skončyć malunak», — raspavioŭ Hleb.
Raniej chłopcy-mastaki ŭvachodzili ŭ skład «HoodGraff» — viadomaj hrupy hraficistaŭ, jakaja zrabiła šerah partretaŭ znakamitych asobaŭ u Viciebsku. Partret Marka Šahała — pieršaja samastojnaja mastackaja praca Jana i Hleba. Jana zroblena nie na zamovu: chłopcy nabyli farby za ŭłasnyja hrošy, pracujuć zadarma, kab zrabić padarunak Viciebsku, dzie hetymi dniami adznačajuć stahodździe viasiella Marka Šahała i Beły Rozenfeld.
U červieni letaś u Miensku sudzili i aštrafavali na 18 miljonaŭ rubloŭ hraficistaŭ, jakija chacieli na transfarmatarnaj budcy namalavać partret Vasila Bykava. Jany taksama naležali da viciebskaj kamandy vuličnych mastakoŭ «HoodGraff». Staličnyja paradki chłapcoŭ ździvili. U rodnym Viciebsku, dzie jany namalavali ŭžo niamała bujnych vyjavaŭ, da milicyi nie dachodziła, chacia miascovyja žychary i nie zaŭždy stavilisia da inicyjatyvy chłopcaŭ z razumieńniem.
«Z nami takoje ŭpieršyniu, — raspaviadaŭ tady Svabodzie adzin z hraficistaŭ, 22-hadovy Arciom. — Usie tak prasili biełarusaŭ namalavać. My z takim entuzijazmam siudy jechali. Vasil Bykaŭ — usio! Malujem! My stolki ŭžo admalavali ŭ Viciebsku. A voś pieršaja sproba ŭ Miensku — i taki dośvied, što tut albo cišej treba heta rabić, albo kali hučna, to ŭžo z aficyjnym dazvołam».
Pačaty partret piśmieńnika ŭ Miensku kamunalniki tady zamalavali farbaj. Zamiest partreta nieŭzabavie na budcy źjaviŭsia nadpis: «Tut byŭ Vasil Bykaŭ».
