Biełaruskaje pradpryjemstva «Pielenh» pačało pradavać svaje pryłady dla kiravańnia ahniom 1K118P dla supraćtankavych samachodnych kompleksaŭ Chryzantema-S, paviedamiŭ internet-resurs «Viestnik Mordovii».
Chryzantema-S
Stabilizavany ŭ dźviuch płoskaściach ciepłavizijny pryceł dapamahaje adšukvać, identyfikavać i vieści celi ŭdzień i ŭnočy, moža farmiravać łaziernaje pole kiravańnia dla naviadzieńnia kiravanych rakiet. Košt pryceła nieviadomy.
Raniej pryceły dla Chryzantem-S rabiŭ ukrainski zavod «Fotaprybor», jaki ŭvachodzić u dziaržaŭny kancern «Ukrabaronpram». Adnak u suviazi z ahresijaj RF suprać Ukrainy suviazi z rasiejskimi klijentami byli razarvanyja.
Chryzantema-S (pa kłasifikacyi NATA — AT-15 Springer) składajecca z šasi bajavoj mašyny piachoty BMP-3 i supraćtankavaha rakietnaha kompleksu z rakietami 9M123, jakija majuć tandemna-kumulacyjnyja ci fuhasna-termabaryčnyja bajavyja častki.
Ekipaž składajecca z dvuch čałaviek, u mašynie znachodziacca 15 rakiet. Praces stralby całkam aŭtamatyzavany. Ličycca, što rakiety 9M123 majuć dalnaść dziejańnia ad 400 da 5000 m pry naviadzieńni pa łaziernym promni i ad 400 da 6000 m pry naviadzieńni pa radyjokanale. Zvyšhukavyja supraćtankavyja rakiety majuć, pavodle dadzienych vytvorcy, bronieprabivalnaść 1000-1100 mm za dynamičnaj abaronaj. Traciłavy ekvivalent fuhasnaj rakiety — 13,5 kh.
