Z času źjaŭleńnia ŭ Minhandlu paŭnamoctvaŭ pa zakryćci abjektaŭ handlu i hramadskaha charčavańnia prypyniałasia dziejnaść 254 abjektaŭ na termin ad čatyroch da tryccaci dzion, paviedamiŭ na pres-kanfierencyi 21 lipienia ŭ Minsku načalnik handlovaj inśpiekcyi Minhandlu Valarjan Biaspały. Ź ich za parušeńnie niepasredna zakanadaŭstva ab cenaŭtvareńni — kala 30 abjektaŭ.
Poŭnaściu zabaroniena dziejnaść handlovaha abjekta ŭ Mahilovie, jaki naležać indyvidualnamu pradprymalniku, i troch abjektaŭ hramadskaha charčavańnia TAA «Sajhon» u Minsku.
Namieśnik ministra handlu Iryna Narkievič nie ličyć, što pry pryniaćci rašeńniaŭ ab prypynieńni pracy mahazinaŭ Minhandlu robić asnoŭny akcent na nievykanańni imi asartymientnaha pieraliku i adsutnaści ŭ patrabujemaj kolkaści biełaruskich tavaraŭ. «Ja, naprykład, baču, što praterminoŭcy akcent zrobleny. I na novych normach u zakanadaŭstvie ab handli — ab paradku ŭ raźlikach, niedapuščeńni dyskryminacyjnych umoŭ u dačynieńni da pastaŭščykoŭ, prazrystaści ŭvachodu na rynak», — adznačyła namieśnik ministra.
Adnak, pavodle jaje słoŭ, zabieśpiačeńnie handlu i hramadskaha charčavańnia asartymientam ajčynnaj vytvorčaści časta chvaluje hramadzian, jakija źviartajucca ŭ Minhandlu, i jano vymušana prymać miery. «My ciapier pravodzim pa subotach haračyja linii, i zadajuć pytańnie: Iryna Uładzimiraŭna, voś ja chacieŭ vypić biełaruskaha piva ŭ piŭnym restaranie, a jaho tam niama, čamu? A inšaziemcy, jakija pryjazdžajuć, jany tym bolš chočuć pakaštavać miascovaje», — skazała čynoŭnica.
Nahadajem, paŭnamoctvami pa prypynieńni dziejnaści abjektaŭ handlu i hramadskaha charčavańnia až da ich poŭnaha zakryćcia Alaksandr Łukašenka nadzialiŭ Minhandlu ŭ śniežni 2014 hoda, padpisaŭšy ŭkaz № 567 «Ab dadatkovych mierach pa abaronie pravoŭ spažyŭcoŭ».
