Piacihadovyja i siamihadovyja jeŭraablihacyi Biełarusi tarhujucca nižej za naminał — takija apošnija danyja Luksiemburhskaj fondavaj biržy.
Jak śviedčać vyniki biržavych tarhoŭ, jakija adbylisia 6 lipienia, košt jeŭraablihacyj, jakija Biełaruś raźmiaściła na piać hadoŭ u žniŭni 2010 hoda, składaŭ 99,5% ad naminału. U toj ža čas siamihadovyja jeŭraablihacyi, jakija Biełaruś raźmiaščała ŭ studzieni 2011 hoda, tarhavalisia pa canie 96,9% ad naminału.
Pry hetym siaredniaja prybytkovaść pa piacihadovych jeŭraablihacyjach składała 15,5%, pa siamihadovych — 10,4%.
Prybytkovaść pa jeŭrabondach ličycca bienčmarkam (aryjenciram) dla vyznačeńnia koštu novych zapazyčańniaŭ. Členy biełaruskaha ŭrada raniej zajaŭlali pra płany pa raźmiaščeńni novych vypuskaŭ jeŭraablihacyj dla pryciahnieńnia valutnych zapazyčańniaŭ u 2015 hodzie.
U pryvatnaści, płanavałasia, što Bank raźvićcia ŭ 2015 hodzie vypuścić jeŭraablihacyi na sumu nie mienš jak 500 młn. dołaraŭ. Akramia hetaha, mierkavałasia, što ŭ 2015 hodzie biełaruski ŭrad raźmieścić čarhovy vypusk jeŭraablihacyj na 1 młrd. dołaraŭ.
Razam z tym u śniežni 2014 hoda na fonie abvastreńnia situacyi na valutnym rynku Biełarusi prybytkovaść biełaruskich jeŭrabondaŭ, jakaja adlustroŭvaje prykładny košt novych zapazyčańniaŭ, rezka vyrasła i z taho času zastajecca na vysokim uzroŭni.
Ministr finansaŭ Uładzimir Amaryn paviedamiŭ u červieni 2015 hoda, što Biełaruś maje namier vyjści z čarhovym vypuskam jeŭraablihacyj u žniŭni 2015 hoda.
Jak paviedamlałasia raniej, Biełaruś u 2010 i ŭ 2011 hadach raźmiaščała dva vypuski jeŭraablihacyj — piacihadovyja i siamihadovyja na ahulnuju sumu 1,8 młrd. dołaraŭ. Raźmiaščeńnie jeŭraablihacyj biełaruskija ŭłady razhladajuć jak adzin ź instrumientaŭ pryciahnieńnia zapazyčańniaŭ na źniešnich rynkach. U pačatku žniŭnia 2015 hoda Biełaruś pavinna pahasić piacihadovy vypusk jeŭraablihacyj.
Nahadajem, na pahašeńnie i absłuhoŭvańnie jeŭrabondaŭ, pavodle paramietraŭ biudžetu, Biełarusi ŭ 2015 hodzie nieabchodna nakiravać amal 1,2 młrd. dołaraŭ.
