Śledčy kamitet pa Bresckaj vobłaści prosić adhuknucca siamiejnuju paru, jakaja fatahrafavałasia pobač ź viertalotam Robinson, što pryziamliŭsia 12 sakavika ŭ Kobrynskim rajonie.
Jak paviedamiła aficyjny pradstaŭnik upraŭleńnia Śledčaha kamiteta pa Bresckaj vobłaści Maryna Drańkova, 12 sakavika pryblizna ŭ 16.30 viertalot z-za kiepskaha samaadčuvańnia adnaho z troch pasažyraŭ ažyćciaviŭ vymušanuju pasadku pobač z raźviazkaj trasy Je30 Brest — Minsk — miaža RF i aŭtadarohi Małaryta — miaža Ukrainy (Makrany). Pavodle słoŭ dvuch pasažyraŭ, paśla pryziamleńnia da ich źviarnułasia siamiejnaja para ź dziciem i paprasiła sfatahrafavacca na fonie viertalota.
«Zrobleny zdymak i pakazańni siamji mohuć dapamahčy va ŭstanaŭleńni akaličnaściaŭ zdareńnia», — adznačyła Drańkova.
Jana nahadała, što pryblizna ŭ 16.40 padčas uźlotu paśla vymušanaj pasadki viertalot blizu vioski Bahač pierakuliŭsia na bok. Piłot i troje pasažyraŭ nie paciarpieli.
Pavodle słoŭ piłota, pry ŭźlocie byŭ mocny viecier, z-za čaho jon nie zdoleŭ spravicca z kiravańniem.
Akaličnaści zdareńnia ŭstanaŭlivaje USK pa Bresckaj vobłaści, jakoje prosić vidavočcaŭ i siamiejnuju paru, što fatahrafavałasia na fonie viertalota, patelefanavać śledčym na numar 8-0162-27-38-19 abo ŭ dziažurnuju čaść USK pa Bresckaj vobłaści na numar 8-0162-27-37-00 ci na liniju 102.
