Mižnarodny rasiejski kanservatyŭny forum sabraŭ palityčnyja ruchi, jakija ŭ svaich krainach nazyvajuć fašysckimi i neanacysckimi. Sotni ŭdzielnikaŭ, mnohija ź jakich byli fihurantami kryminalnych spraŭ, pryjechali ŭ čatyrochzorkavy hatel Holiday Inn u Sankt-Pieciarbuhu.
U toj samy čas pierad uvachodam u hatel picierskaja palicyja zapichvała ŭ palicejskija mašyny niešmatlikich udzielnikaŭ antyfašysckich pikietaŭ.
«Tam sabralisia fašysty, — kaža dziaŭčyna, jakaja pryniesła na pikiet plakat «Stop rasizm»». «A čamu ich tam u hateli sotni, a vas tut na chałodnaj vulicy adzinki?» — na pytańnie karespandenta Svabody dziaŭčyna moŭčki paciskaje plačyma. «Heta rytaryčnaje pytańnie», — adkazvaje za jaje siabar.
Zvonku forum, jaki arhanizuje picierskaje adździaleńnie partyi «Rodina», nahadvaje zvyčajnuju kanferencyju. Spačatku ŭ vočy kidajucca tolki kazaki. Jany nibyta sočać za paradkam, ale vakoł najbolš važnych personaŭ — svaje achoŭniki, zvyčajnyja mažnyja chłapcy ŭ kaściumach. Kazaki vyhladajuć dekaracyjaj, asabliva dziaŭčyna ŭ kazackaj formie.
Jość kolki prykmietnych źniešnie čałaviek — u kamuflažy, z tatujavanymi rukami, paholenymi skroniami. Ale bolšaść udzielnikaŭ padziei, jakuju ŭžo nazvali «forumam neanacystaŭ» — zvyčajnyja mužčyny i žančyny ŭ bolš-mienš respektabelnych strojach.
Siońnia jany vyhladajuć tak.
«Hamasieki i leśbijanki biehajuć vakoł»
Volha Čyžyk-Kinunen. Hetaja žančyna siadzić u faje pierad pačatku forumu i trymaje ŭ rukach ściah Finlandyi. Na pinžaku ŭ jaje vialiki značak «Rodina Svoboda poetomu Putin». U Finlandyi Volha žyvie ŭžo 20 hadoŭ i pradstaŭlajecca siabroŭkaj mižnarodnaha «Nacyjanalna-Vyzvalenčaha ruchu» (NOD, «Nacionalno-osvoboditielnoje dvižienije»).
Volha Čyžyk-Kinunen
Čyžyk-Kinunen achvotna i impetna apisvaje harotny stan paŭnočnaj susiedki Rasiei, u jakim taja apynułasia z-za prošukaŭ NATO i ZŠA:
«Ciapier heta (Finlandyja — RS) chutka budzie, prabačcie mianie, jak niejkaja afrykanskaja respublika. Ahramadnaja pazyka ŭ Finlandyi, kalasalnaje biespracoŭje — paradku 600 tysiač. My zmahajemsia z eŭrapiejskaj niečyściu i hetymi masonami, jakija daminujuć u ich Eŭropie», — kaža jana.
«Słava bohu, u nas pravasłaŭnaja carkva, słava bohu, my ruskija, słava bohu, u nas niama takich haniebnych zakonaŭ, jakija zaraz pryniatyja ŭ Finlandyi, prabačcie, pra adnapołyja šluby, — praciahvaje Volha. — Zaraz hetyja leśbijanki i hamasieki biehajuć vakoł. A ambasadar Złučanych Štataŭ važniejšy, čym urad. Jon kiruje hetaj krainaj. Taksama homaseksualist. Ameryka kosić usich».
Kali my razmaŭlali z Volhaj, ja jašče nia viedała, što ŭ jaje karotkaj i emacyjnaj pramovie — karotki kanspekt vystupaŭ, jakija daviadziecca prasłuchać na praciahu nastupnych hadzinaŭ.
Možna było b i paśmiajacca, ale NOD, jaki pradstaŭlaje Volha, jość i ŭ Biełarusi. Jahony kaardynatar miančuk Uładzimier Ryžankoŭ. Pra svaje abaviazki jon ščyra piša ŭ profili Vkontaktie. Na «ścianie» Ryžankoŭ abiacaje «zapomnić» staršyniu BNF Alaksieja Janukieviča, nie dapuścić u Miensku akcyi ŭšanavańnia pamiaci Barysa Niamcova, a fotazdymak z raźvitańnia supravadžaje podpisam «Miensk nie ŭ žałobie, sabaku — sabačaja śmierć. Na vajnie jak na vajnie». Asnovu słoŭnikavaha zapasu Ryžankova składajuć słovy «pidar» i «hiejropa».
«Žadaju vam pośpiechaŭ na Danbasie»
Kalidor pierad uvachodam u zalu «Piatroŭ-Vodkin» upryhožany plakatami Moara i Rodčanki. Tut prahulvajecca ŭ kampanii siabroŭ kiraŭnik dyversijna-šturmavoj hrupy ŁNR Alaksiej Milčakoŭ.
Alaksiej Milčakoŭ (u centry)
24-hadovy pieciarburžac, jakoha nazyvajuć adnym z samych niebiaśpiečnych terarystaŭ Danbasu, neanacystam i fašystam-skurałupam. Padčas forumu Milčakoŭ uvieś čas abdymaje svaju dziaŭčynu ŭ ščylnaj karotkaj sukiency.
U zali da Milčakova ledźvie nia kidajucca dva pradstaŭniki Nacyjanał-demakratyčnaj partyi Niamieččyny Karł Rychter i Jens Piuse. Piuse nazyvajuć druhim čałaviekam u partyi. Mienavita jon pažadaŭ Milčakovu «pośpiechaŭ na Danbasie».
Milčakoŭ pa-anhielsku nie havoryć, na dapamohu prychodzić siabroŭka:
«My chočam atrymlivać ad vas bolš detalaŭ pra amerykanskuju padtrymku Ŭkrainy, — kaža Rychter. — U nas jość mahčymaści havaryć u parlamencie pra toje, čaho nia viedajuć u Zachodniaj Eŭropie. U nas jość kantakty z čalcami parlamentu ŭ Strasburhu».
«My možam pieradavać infarmacyju jak pra raniejšaje, tak i naŭprost pra chadu bajavych dziejańniaŭ», — adkazvaje Milčakoŭ.
Nacyjanalna-demakratyčnyja partyja Niamieččyny na forumie pradstaŭlenaja svaim lideram Uda Fojhtam, ciapier deputatam Eŭraparlamentu. U 2012-m jaho asudzili na 10 miesiacaŭ turmy za ŭchvaleńnie sałdataŭ vafen-SS, jakija byli asudžanyja za złačynstvy suprać čałaviečnaści. Ale Fojht za apošniaje dziesiacihodździe adznačyŭsia nia raz. U 2007 u interviju iranskamu telebačańniu jon zajaviŭ, što kolkaść achviaraŭ hałakostu składaje nie 6 miljonaŭ, a 340 tysiač. Jaho pohlady ŭ niekatorych ŚMI charaktaryzujucca jak ksenafobskija i antysemickija, a samu partyju ŭhołas nazyvajuć neanacysckaj.
Za 60 hadoŭ isnavańnia jaje nia raz sprabavali zabaranić na radzimie ŭ Niamieččynie. Apošni raz heta nie ŭdałosia zrabić u 2012. Tady za suviaź z neanacysckaj arhanizacyjaj «Nacyjanał-sacyjalistyčnaje padpolle», jakaja abvinavačvałasia ŭ zabojstvie 10 čałaviek, byŭ zatrymany ŭpłyvovy čalec partyi Ralf Volebien.
Što tyčycca Piusie, to ŭ maładości jon uvachodziŭ u daŭno ŭžo zabaronienuju neanacysckuju hrupoŭku Nacyjanalistyčny front. Front mieŭ uzbrojenaje kryło i byŭ abvinavačany ŭ šerahu napadaŭ i zabojstvaŭ.
Milčakoŭ paśla tłumačyć, što jamu važnyja suviazi ź lubymi eŭrapiejskimi ruchami. Pieršaja meta hetaj kansalidacyi — «prablema Ŭkrainy i antynarodnaj palityki ŭkrainskaj ułady».
Alaksiej Milčakoŭ razmaŭlaje z pradstaŭnikami Nacyjanał-demakratyčnaj partyi Niamieččyny
Naša meta — pabudova Eŭropy
Forum adkryvajecca karotkim ekskursam u historyju NATO. «Heta praeŭrapiejskaja arhanizacyja? — pytajecca arhanizatar forumu, siabar partyi «Rodina» Jury Lubamirski. — Jana niasie joj tolki pahrozu. Jaje meta ŭ tym, kab Eŭropa stała krainaj treciaha śvietu».
«Našaja meta — pabudova Eŭropy. My zmahajemsia ź niebiaśpiečnym voraham», — hetymi słovami Lubamirski daje start vystupam.
«Usich, chto vitajecca ź lubym z čalcoŭ kijeŭskaha ŭradu, možna nazvać radykałam, pasobnikam fašystaŭ. My ž z vami vystupajem jak miratvorcy», — zajaŭlaje Fiodar Birukoŭ z Sacyjalna-patryjatyčnaha klubu «Stalinhrad».
Słovy: «Toje, što adbyvajecca na terytoryi Danbasu, heta nia tolki vajna, nia tolki hienacyd rasiejskaha narodu, a vajna, raźviazanaja administracyjaj Vašynhtonu ŭ Eŭropie», — Birukoŭ patrabuje ŭnieści ŭ rezalucyju forumu.
«Niadaŭna rasiejski narod ažyćciaviŭ prava narodu na samavyznačeńnie i viartańnie narodu, adrynutaha svajoj radzimaj, — rasiejskaha kanservatara Kanstancina Kryłova zala vitała vopleskami. — Rasiejskaje paŭstańnie na Danbasie zaraz musić być padtrymanaje jak paŭstańnie hrekaŭ suprać Asmanskaha ŭładarańnia».
Kanstancin Kryłoŭ (źleva)
Vopleskami zala adaryła Kryłova i za novaje aznačeńnie słova «talerantnaść».
«Naprykład, prabačcie, prastytucyja, — skazaŭ Kryłoŭ, kali raspaviadaŭ pra toje, što ŭsim nam treba viarnucca da kaštoŭnaściaŭ staroj Eŭropy ŭzoru 19 stahodździa i napaleonaŭskaha kodeksu. — «Dom ciarpimaści» heta byŭ «dom talerantnaści» (śmiech i apladysmenty). Zaraz hetaje słova źmianiłasia. Raniej heta aznačała źjavu, jakuju ciarpieli, ale hramadztva nie ŭchvalała. Ciapier heta źjava, jakuju hramadztva musić nia toje, što tryvać, ale i ŭchvalać».
«My chočam być u adnoj siamji z rasiejskimi ludźmi. Ruskija ludzi pradstaŭlajuć adradžeńnie Eŭropy i chryścijanskaj Eŭropy, — viaščaŭ z trybuny paśladoŭnik tradycyj italjanskaha fašyzmu i fihurant spravaŭ ab teraryźmie Raberta Fiore, kiraŭnik partyi «Novaja siła». — Heta nia ja kažu, heta Boh kaža heta».
Advakat rasisckich idejaŭ i aŭtar knihi «Biełaja identyčnaść» Džared Tejłar vybačaŭsia za svaju radzimu ZŠA. Tłumačyŭ, jak «niemahčyma padtrymlivać aŭtentyčnyja tradycyi ŭ sumiesi eŭrapiejcaŭ, łacinaamerykancaŭ i azijataŭ, i što raznastajnaść źjaŭlajecca zabojcaj usich kaštoŭnaściaŭ».
«Vašaja baraćba — heta maja baraćba», — niedvuchsensoŭna skončyŭ svoj vystup amerykaniec.
Prychilniku vafen-SS i eŭradeputatu Uda Fojhtu plaskali ŭ ładki nia raz.
«My vystupajem za identyčnaść narodaŭ Eŭropy. U centry našaj palityki nie amerykanski sposab žyćcia (apladysmenty), nie prablemy pederastaŭ i leśbijanak (jašče raz apladysmenty). Centar našaj palityki — našy siemji, našy dzieci (i jašče raz apladysmenty)», — Fojht zali jaŭna spadabaŭsia.
Najmienš uvažliva słuchali pradstaŭnikoŭ ultrapravaj hreckaj partyi «Załaty zołak» Elefteryjasa Synadynasa i Hieorhiasa Epitcideiasa. Abodva, darečy, deputaty Eŭraparlamentu. Kiraŭnika ichnaj partyi Nikasa Michałaliakasa tolki-tolki vypuścili z turmy paśla 18 miesiacaŭ źniavoleńnia. Abvinavačvajecca jon u zabojstvie, jak i piać inšych jurystaŭ partyi. Statut partyi naŭprost piša, što na siabroŭstva ŭ joj mohuć pretendavać tolki «aryjcy pa kryvi i hreki pa pachodžańni».
Hreckija ŭdzielniki forumu da taho ž paśladoŭna adstojvajuć pazycyi Rasiei ŭ Eŭraparlamencie i vystupajuć suprać sankcyj. A Elefteryjas na 15 chvilinaŭ prapanavaŭ plan usiebakovaha supracoŭnictva pamiž Rasiejaj i Hrecyjaj. Ale jaho mała chto słuchaŭ.
Mnie soramna za svoj horad
«Nam nia treba zamiežnyja nacysty ŭ Piciery. Svaich niama kudy padzieć», «Panajechali tut», «Mnie soramna za moj horad», — z takimi plakatami vyjšli pratestavać pierad hatelem hramadzkija aktyvisty. Jany nazyvajuć siabie tolki imionami i nastojvajuć, što nie pradstaŭlajuć anijakich ruchaŭ.
«Kamična, što ludzi radykalnych pohladaŭ źbirajucca tut u tydzień suprać rasizmu, — kaža dziaŭčyna. — Heta symbalična».
«Nijakaha antyfašysckaha ruchu niama», — kaža chłapiec ź plakatam «Panajechali tut».
Pavodle rasiejskich praviłaŭ, na adzinkavy pikiet nie patrebny dazvoł. Kab tvoj pikiet byŭ adzinkavym, adlehłaść pamiž pikietoŭščykami musić być nia mienš za 50 metraŭ. Za hetym žorstka sočać milicyjanty.
«Mnie zdajecca, što toje, što siońnia adbyvajecca, za heta musić być soramna. Mnie soramna i za siabie i za svoj horad. Siońnia adbyvajecca źjezd ludziej z rasisckaj, neanacysckaj idealohijaj», — pieciarburžanka ŭ piatym pakaleńni Taćciana Fiodarava taksama staić u pikiecie. — Maje baćki pieražyli blakadu. Naš horad histaryčna słaviŭsia talerantnaściu. Mnie soramna».
Spačatku zdavałasia, što pratest pierad hatelem budzie niešmatludnym, ale nieviadoma adkul źjaŭlajecca «samba-bend». Zusim maładzieńkija dziaŭčaty bjuć u baraban i emalavanuju misku i kryčać: «Naci F..k off. Niet fašizmu vsiech mastiej ot podvorotien do vłastiej». Heta ŭžo niesankcyjanavanaje mierapryjemstva, i palicyja chucieńka zapichvaje dziaŭčat u svaju mašynu. Ale dźviery zamknuć zabyli, i pakul palicyjanty ŭcichamirvajuć inšych pratestantaŭ, dziaŭčaty ŭciakajuć.
U hety momant da pratestoŭcaŭ prosta ŭ kašuli vychodzić «demakrat i kanservatar» Kanstancin Kryłoŭ. U jaho važnaja misija: jak vidavočca jon pryjšoŭ raspavieści, što ŭ Holiday Inn niama fašystaŭ:
«Ja ŭvažliva słuchaŭ hetaha niemca (Uda Fojhta — RS). Ja jakraz raźličvaŭ, što jon vyjdzie, zihu kinie i kryknie niešta pra nacy. Ale jon kazaŭ pra toje, što jany ŭ Eŭraparlamencie padtrymlivajuć Rasieju. A dalej zrabiŭ typovuju pramovu eŭraskieptyka.
A dalej byŭ «Załaty zołak». Ja voś dumaŭ, što choć jany «zapalać». — Kryłoŭ raspavioŭ, što emblema «zołku» nia svastyka, a «meandar», i jon sam bačyŭ amfary z takimi meandrami. — A viedajecie, pra što jon kazaŭ? Ja, ščyra kažučy, rahataŭ. Jon staŭ kazać pra ekspart sielskahaspadarčaj pradukcyi ŭ Rasieju, kali Rasieja admienić sankcyi. To bok pra maśliny, pra aliŭki i pra ŭsio heta».
«Ščyra skažu, mnie chutčej spadabałasia toje, što jany kažuć», — zaklučaje Kryłoŭ.
Jon navat sprabuje ŭ niečym pierakanać kupku antyfašystaŭ, ale jahonuju demahohiju zahłušajuć pieśniaj:
«Lusia, darahaja, šlu tiebie priviet.
Hłazki vostryje tvoi znajet ciełyj śviet.
Ot bolšich horodov do bieskrajnich moriej
Pomnit každyj trietij o vintovkie tvojej.
Ot vintovki tvojej, ot vintovki tvojej,
Trista nacistov polehli sriedi polej».
P.S. Kala pałovy na šostuju viečara źjaviłasia paviedamleńnie, što budynak Holiday Inn zaminavany. Usich abiacali evakujavać, ale ŭdzielniki forumu śćviardžajuć, što paśpieli padpisać svaju rezalucyju da evakuacyi.
