U Pieršamajskim sudzie Viciebska 20 sakavika skončyŭsia niezvyčajny praces. 25-hadovaha haradžanina, jaki zabiŭ ščaniuka svajoj dački, aryštavali na piać sutak, paviedamlaje «SB Biełaruś Siehodnia».
Tak vyhladała Lusi.
Staršynia suda Andrej Andrušenka ŭpeŭnieny: kali b u hramadstvie šyroka nie abmiarkoŭvałasia ŭzmacnieńnie žorstkaści zakona ab abychodžańni z žyviołami, to heta administracyjnaja sprava naŭrad ci dajšła b da sudu.
Maleńkaja Lusi źjaviłasia ŭ siamji K. kala troch miesiacaŭ tamu. Simpatyčnaha ščaniuka kiraŭnik siamiejstva uziaŭ z prytułku dla biazdomnych žyvioł - vyrašyŭ zrabić siurpryz žoncy i dvuchhadovaj dačce. Pryhožaha sabačku šakaładnaj afarboŭki ź biełaj hrudkaj lubili i susiedskaja dziatva, i chatnija. U prytułku taksama radavalisia, što znajšli małomu siamju. Novy haspadar zdaŭsia supracoŭnikam całkam kłapatlivym: dakładna vykonvaŭ zahady, pryvodziŭ hadavanca na pryščepki i inšyja pracedury.
Pieršyja padazreńni ab niaščaści zakralisia, kali paśla sterylizacyi ŭ Lusi akazaŭsia zapuščany šoŭ. I heta niahledziačy na toje, što ŭ prytułku biaspłatna vydali i śpiecyjalnuju huńku, i maź. Plus da ŭsiaho na śpinie ščaniuka vyjaviłasia vialikaja hiematoma. Tłumačačy pryčyny mocnaha ŭdaru, haspadar spasłaŭsia na toje, što Lusi zanadta pieściać i dzieści stuknułasia sama.
Sabaka pravioŭ pad nahladam vieturačoŭ tydzień. Papraviŭsia.
U sudzie pradstaŭniki prytułku płakali - ščaniuk ŭžo pierad špitalizacyjaj zdaŭsia im hałodnym i zapałochanym, a paśla lačeńnia vidavočna nie chacieŭ iści da haspadara.
Ale nichto i ŭjavić sabie nie moh, što ŭsio nastolki surjozna. Trahiedyja zdaryłasia niezadoŭha da Novaha hoda. Uviečary ŭ siamji adbyłasia svarka. A nočču małady baćka, pakul žonka ź dziciem znachodzilisia ŭ susiednim pakoi, uziaŭsia za vychavańnie ščaniuka.
Kroŭ na padłozie, chaładzilniku, hazavaj plicie, špalerach i zachutany ŭ anuču trup žyvioły - takuju karcinu ranicaj ŭbačyła haspadynia. A nočču jana, jak śćviardžaje, prosta bajałasia vyjści na kuchniu - kali muž niećviarozy, źviazvacca ź im niebiaśpiečna.
Pra toje, što haspadar časta źbivaŭ ščaniuka, a ŭ tuju noč jon viščaŭ i skuholiŭ ad bolu prykładna na praciahu hadziny, kazali i susiedzi, jakija vystupali ŭ sudzie ŭ jakaści śviedak.
Sam abvinavačany ličyć toje, što zdaryłasia niaščasnym vypadkam. Śćviardžaje, što jon prosta haniaŭsia za Lusi pa kuchni, a potym sabaka zasieŭ za batarejaj. Sprabujučy jaho vyratavać, ciahnuŭ za nohi. Voś toj i pamior. Detalaŭ nie pamiataje, bo byŭ «vypiŭšy».
Piać sutak aryštu - takoje rašeńnie vyniesła sudździa. Abvinavačanamu pašancavała: žudasny vypadak adbyŭsia ŭ minułym hodzie. A pa novym zakanadaŭstvie hety termin moh być u šeść razoŭ bolšy.