Za apošnija 25 hadoŭ siaredniaja tempieratura pavietra ŭ Biełarusi pieravysiła normu na 1,2°S, paviedamiła 19 sakavika na bryfinhu ŭ Minsku načalnik adździeła klimatu Respublikanskaha centra pa hidramietearałohii, kantroli radyjeaktyŭnaha zabrudžvańnia i manitorynhu navakolnaha asiarodździa Alena Kamaroŭskaja.
Norma siaredniehadavoj tempieratury ŭ Biełarusi — 5,8°S, ale, pavodle słoŭ śpiecyjalista, z 1989 hoda ŭ krainie nazirajecca samaje praciahłaje i intensiŭnaje za historyju nazirańniaŭ paciapleńnie. Za hety pieryjad siaredniaja tempieratura pavietra vyrasła praktyčna ŭ kožnym miesiacy, ale najbolš prykmietna — u zimovyja i viasnovyja miesiacy, što pryviało da bolš rańniaha sychodu śniežnaha pokryva i pierachodu tempieratury da plusavych značeńniaŭ. «U siarednim za 25 hadoŭ hety pierachod prachodzić na 10-15 dzion raniej za zvyčajnyja terminy», — adznačyła śpiecyjalist.
Akramia taho, źmianilisia daty pierachodu siaredniasutačnaj tempieratury praz peŭnyja miežy, naprykład, na dekadu raniej pačynajecca viehietacyjny pieryjad, adpaviedna i jaho praciahłaść pavialičyłasia ŭ siarednim na 12 dzion.
U pieryjad paciapleńnia źmianiłasia taksama raźmierkavańnie apadkaŭ pa terytoryi krainy i pavialičyłasia ich kantrasnaść. «Kali siarednija sumy apadkaŭ značna nie źmianilisia, to prykmietna źmianiłasia nieraŭnamiernaść ich vypadzieńnia jak na praciahu hoda, tak i ŭ cełym za asobnyja hady. Prykładna ŭ pałovie hadoŭ pieryjadu paciapleńnia ŭ krainie adznačajucca zasušlivyja ŭmovy na praciahu dvuch i bolš miesiacaŭ — heta asabliva adčuvalna ŭ pieryjad aktyŭnaj viehietacyi raślin. U toj ža čas u hety pieryjad adznačajucca i vyklučna vilhotnyja hady», — raskazała Kamaroŭskaja.
Pavodle jaje słoŭ, u siarednim za apošnija 20 hadoŭ niedabor apadkaŭ adznačany ŭ krasaviku, červieni i žniŭni, kali vypadała adpaviedna 91%, 93% i 88% ad normy, niekalki bolš za normu apadkaŭ nazirałasia ŭ lutym, sakaviku i kastryčniku. Pamianšeńnie apadkaŭ adznačajecca, u pryvatnaści, u paŭdniovaj mielijaravanaj častcy krainy, a na poŭnačy, naadvarot, adznačany niaznačny rost apadkaŭ.
Kolkaść dzion z apadkami za pieryjad paciapleńnia pamienšyłasia sa 175 da 167. «Tendencyi pamianšeńnia dzion z apadkami adznačanyja jak u chałodnyja, tak i ŭ ciopłyja pieryjady. Pamianšeńnie kolkaści dzion z apadkami adbyłosia ŭ asnoŭnym z-za pamianšeńnia kolkaści dzion z małoj kolkaściu apadkaŭ — ad 0,1 da 0,4 milimietra», — patłumačyła śpiecyjalist. U cełym, pavodle jaje słoŭ, źmianieńni ŭ vypadzieńni apadkaŭ niaznačnyja.
