U žniŭni 2013 hoda minčanka Ała zaklučyła z Upraŭleńniem kapitalnaha budaŭnictva (UKB) Centralnaha rajona Minska damovu na budaŭnictva adnapakajovaj kvatery płoščaj 38 kvadratnych mietraŭ.
Dom №14 pa vulicy Kamajskaj u Minsku.
Na toj momant dom №14 pa vulicy Kamajskaj budavaŭsia treci hod — pačali budaŭnictva jašče ŭ vieraśni 2010 hoda. I kali žančyna padpisvała damovu, da ŭvodu ŭ ekspłuatacyju doma było jašče daloka.
Kali Ała zaklučała dahavor, jaje «adnapakajoŭka» kaštavała 40 tysiač dalaraŭ, plus žančynie daviałosia zapłacić 32 miljony rubloŭ indeksacyi. Pieršy ŭniosak u 50% žančyna zapłaciła adrazu, astatniuju sumu unosiła pa častkach na praciahu paŭhoda.
Zdać dom u termin znoŭ nie zmahli, jon trapiŭ u śpis daŭhabudaŭ i byŭ dabudavany tolki ŭ mai minułaha hoda.
Zasialać novabudoŭlu pačali ŭ kastryčniku. Navat nie paśpieŭšy ŭsialicca ŭ kvateru, Ała atrymała pieršuju pozvu ŭ sud.
Akazałasia, u sud źviarnulisia spadkajemcy dolščycy, jakaja pačynała budavać hetuju kvateru, zapłaciŭšy tolki pieršy ŭniosak u 2011 hodzie. A kali budaŭnictva spyniłasia, taja płacić pierastała.
Praz dva hady, kali UKB nakiravała toj pieršaj dolščycy paviedamleńnie ab skasavańni dahavora za niavypłatu, akazałasia, što taja pamierła.
Praź niekalki dzion paśla atrymańnia paviedamleńnia ad UKB dačka dolščycy zapłaciła zabudoŭščyku ŭsiu sumu za kvateru, a kali dom zdali, padała ŭ sud na UKB jak spadčyńnica.
«Zahvozdka ŭ tym, što UKB skasavaŭ damovu paśla śmierci žančyny. Choć pavinien byŭ skłaści novuju damovu sa spadkajemcami i nie mieŭ prava zaklučać damovu sa mnoj. Vychodzić, što UKB pakarystaŭsia maimi hrašyma, a ciapier vyhaniaje mianie z kvatery, — kaža Ała. —
Spadkajemcam dolščycy sud prapanavaŭ inšuju kvateru, u inšym domie UKB, jaki jašče nie pabudavany. Zrazumieła, što jany admovilisia i chočuć maju (užo hatovuju) kvateru, u jakoj ja ŭžo žyvu.
U mianie ž varyjantaŭ niašmat: UKB patrabuje vysialacca z kvatery i zabirać hrošy, pryčym bieź indeksacyi. Heta značyć ja straču kala 10 tysiač dalaraŭ.
Čakać kvateru ŭ inšym domie taksama prapanoŭvali. Ale tam pabudavany usiaho dva pavierchi, kali jaho zdaduć — nieviadoma».
Čamu z Ałaj skłali damovu na kvateru, viedajučy, što dolščyca pamierła i na kvateru buduć pretendavać spadkajemcy, u UKB žančynie nie tłumačać.
Kažuć tolki, što ludzi, jakija dapuścili pamyłku, tam užo nie pracujuć i šukać vinavatych nichto nie budzie.
Paśla rašeńnia suda Centralnaha rajona nie ŭ jaje karyść žančyna padała kasacyjnuju skarhu ŭ Minski haradski sud. Tam paśla razhladu spravu nakiravali znoŭ u sud Centralnaha rajona. Čarhovaje pasiadžeńnie adbudziecca 31 sakavika, ale navat advakat Ały kaža, što sprava projhryšnaja i kvateru joj naŭrad ci pakinuć.
«Abskardžvać rašeńnie suda ja mahu, ale dla hetaha treba pahadžacca na hetaje rašeńnie, vysialacca z kvatery, zabirać hrošy i padavać pazoŭ u sud na UKB. Za hety mnie daviadziecca płacić pošlinu, jakaja składaje 5% ad koštu kvatery, kala 2 tysiač dalaraŭ, — kaža Ała. — Situacyja, viadoma, žudasnaja.
Kali ja zaklučała dahavor, dumała, što dziaržaŭny zabudoŭščyk mianie nie padmanie. Ale vychodzić: heta zusim nie harantyja».
Va Upraŭleńni kapitalnaha budaŭnictva Centralnaha rajona prakamientavać situacyju da rašeńnia suda nie zmahli.
