Biehły Viktar Janukovič byŭ usiaho tolki pasłuchmianaj maryjanietkaj u rukach Rasii.
Pra heta zajaviŭ prezident Ukrainy Piatro Parašenka na cyrymonii ŭručeńnia dziaržaŭnych uznaharod členam siemjaŭ Hierojaŭ Niabiesnaj Sotni.
president.gov.ua
«Ciapier užo kančatkova zrazumieła, što my na Majdanie hod tamu zmahalisia nie ź Janukovičam. Jon byŭ tolki žorstkaj i pasłuchmianaj maryjanietkaj. Ahresija Rasii suprać Ukrainy pačałasia jašče sa zryvu padpisańnia Pahadnieńnia ab asacyjacyi ź Jeŭrasajuzam, jakoje pavinna było adbycca ŭ Vilni. Da likvidacyi i razarvańnia Ukrainy ŭ Maskvie rychtavalisia jašče da pieramohi Majdanu. Jany čakali padzieńnia Janukoviča z dnia na dzień — i paskoryli chod padziej», — adznačyŭ jon.
«Ad tych trahičnych padziej, kali kožny z vas straciŭ svaich rodnych ludziej, a ŭsia Ukraina — najlepšych svaich synoŭ i dačok, prajšoŭ ceły hod. Ale nie prachodzić — i nikoli nie projdzie! — hłyboki bol ad toj biezzvarotnaj straty. Hałovy pierad śvietłaj pamiaćciu Hierojaŭ Niabiesnaj Sotni schilaje ŭsia kraina. Ja nie znachodžu słoŭ, kab suciešyć vas, tamu što takich słoŭ adšukać niemahčyma. Takich słoŭ prosta nie isnuje! Ź siońniašniaha dnia i da kanca žyćcia Ukrainy kožnaha 20 lutaha budzie adznačacca Dzień Hierojaŭ Niabiesnaj Sotni, jakija addali svajo žyćcio padčas Revalucyi Hodnaści, abaraniajučy Ukrainu. Dziakujučy ich samaachviaravańniu my žyviom i dychajem, i majem unikalny šaniec źmianić krainu da lepšaha, i barani Boža nam jaho stracić», — dadaŭ jon.
Taksama Parašenka paviedamiŭ, što, pavodle pakazańniaŭ bajcoŭ śpiecpadraździaleńnia SBU «Alfa», snajpierskimi hrupami padčas rasstrełu Jeŭramajdanaŭcaŭ kiravaŭ pamočnik prezidenta RF Uładzisłaŭ Surkoŭ.
«Litaralna na dniach kiraŭnictva SBU prainfarmavała mianie ab tym, što dapytanyja joju bajcy «Alfy» dali pakazańni, što pamočnik prezidenta Rasii Uładzisłaŭ Surkoŭ kiravaŭ arhanizacyjaj snajpierskich hrup zamiežnikaŭ na Majdanie», — skazaŭ prezident na cyrymonii ŭručeńnia dziaržaŭnych uznaharod členam siemjaŭ hierojaŭ Niabiesnaj sotni ŭ piatnicu ŭ Kijevie.
Parašenka paviedamiŭ, što śledstva atrymała dostup da zapisaŭ pryvatnych telefonnych razmoŭ Viktara Janukoviča z pradstaŭnikami rasijskich siłavych struktur. Jany razam zahadzia rychtavalisia da rasstrełu aktyvistaŭ.
«Pytańni złačynstvaŭ suprać čałaviečnaści nie majuć terminu daŭnaści. Ale pastaŭlu i sabie, i vam rytaryčnaje pytańnie: chiba Rasija kaliści vydaść nam złačynca Janukoviča, hałoŭnaha vinavataha krovapralićcia na Majdanie? Ja nie sumniavajusia, što jon budzie viečna hareć u piekle, ale heta ŭžo pa-za jurysdykcyjaj ziamnoha suda. Tym nie mienš, dla tryumfu spraviadlivaści pa majoj inicyjatyvie Viarchoŭnaja Rada pryniała zakon ab mahčymaści zavočnaha pryciahnieńnia da adkaznaści kiraŭnikoŭ byłoha režymu, jakija zabivali ludziej i rabavali krainu, ale hetaha niedastatkova», — skazaŭ prezident Ukrainy.
Raniej kiraŭnik SBU Valancin Nalivajčanka apublikavaŭ infarmacyju, što pamočnik prezidenta RF Pucina Uładzisłaŭ Surkoŭ ažyćciaŭlaŭ kiraŭnictva snajpierskimi zamiežnymi hrupami ŭ Kijevie ŭ lutym 2014 hoda.
