Paradak pryjomu ŭ Biełaruski dziaržaŭny ŭniviersitet infarmatyki i radyjoelektroniki (BDUIR) sioleta krychu źmianiŭsia.
Jak paviedamiŭ na pres-kanfierencyi 19 lutaha prarektar pa navučalnaj pracy i infarmatyzacyi VNU Barys Nikulšyn, padać zajavu na pastupleńnie sioleta možna budzie pa elektronnaj pošcie. Abituryjentu nieabchodna stvaryć svoj asabisty kabiniet na sajcie priem.bsuir.by dla papiaredniaj rehistracyi zajavy ŭ pryjomnaj kamisii BDUIR.
«Jak tolki budzie stvorana pa prykładzie Ukrainy baza atestataŭ, my zmožam pravodzić zaličeńnie bieź niepasrednaj jaŭki abituryjenta ŭ pryjomnuju kamisiju. Heta značyć budzie dastatkova tolki elektronnaj zajavy abituryjenta», — dadaŭ prarektar.
Akramia taho, pavodle słoŭ Nikulšyna, sioleta abituryjenty pavinny buduć zahadzia skłaści śpis śpiecyjalnaściaŭ, jakija im cikavyja. Zaličeńnie budzie ažyćciaŭlacca stroha na ŭkazanyja śpiecyjalnaści. Kali ŭ śpisie ich tolki piać i ni na adnu ź ich bałaŭ nie chapaje, kampjutar aŭtamatyčna vyklučaje takoha abituryjenta sa śpisa pretendentaŭ na hetuju biudžetnuju formu navučańnia, rastłumačyŭ prarektar.
Jašče adnym novaŭviadzieńniem stanie ŭnutrany ekzamien dla abituryjentaŭ, jakija pastupajuć na skaročanuju formu navučańnia. «My prapanoŭvajem abituryjentam ź niedastatkova vysokimi bałami nie vypraboŭvać los i ŭnosić u śpis jak maha bolš śpiecyjalnaściaŭ ci navat usie ź ich», — adznačyŭ Nikulšyn.
Što datyčycca vypusknikoŭ siarednich śpiecyjalnych navučalnych ustanoŭ, jakich u BDUIR prymali pa vynikach centralizavanaha testavańnia, to z hetaha hoda jany zmohuć zamiest CT zdavać ekzamien pa svaim profili. Takim čynam, ich šansy na pastupleńnie pavialičvajucca, adznačyŭ Nikulšyn. Słabyja studenty zmohuć pavysić svaje viedy da patrebnaha ŭzroŭniu padčas dadatkovych zaniatkaŭ, dadaŭ jon.
Akramia taho, adznačyŭ prarektar, sioleta nabor na dzionnuju formu viadziecca pa čatyroch anhłamoŭnych śpiecyjalnaściach — «Inžynierna-psichałahičnaje zabieśpiačeńnie infarmacyjnych technałohij», «Aŭtamatyzavanyja sistemy apracoŭki infarmacyi», «Infakamunikacyjnyja technałohii», «Abarona infarmacyi ŭ telekamunikacyjach».
Śpis papoŭnicca i dźviuma śpiecyjalnaściami pa dystancyjnym navučańni — «Prahramavanyja mabilnyja sistemy», «Infarmacyjnyja sistemy i technałohii (u biźnies-mieniedžmiencie)».
Novych śpiecyjalnaściaŭ sioleta va ŭniviersitecie nie źjavicca. «Pakul u nas takoj nieabchodnaści niama. Pracedura heta davoli składanaja — i pa časie, i pa zatratach. Isnych śpiecyjalnaściaŭ pakul chapaje», — adznačyŭ prarektar pa navučalnaj pracy i infarmatyzacyi BDUIR.
