Alaksandr Łukašenka nie spadziajecca na naładžvańnie adnosin Biełarusi z Zachadam paśla praviadzieńnia ŭ Minsku pasiadžeńnia lidaraŭ krain «narmandskaj čaćviorki» pa ŭrehulavańni situacyi va Ukrainie.
Pra heta jon zajaviŭ u intervju viadučamu prahramy «Viesti v subbotu» na telekanale «Rośsija 1» Siarhieju Brylovu.
«Ja b nie havaryŭ, što my niejak naładzili adnosiny ź imi (ź lidarami jeŭrapiejskich krain). Nie piešču tut nijakich nadziej. Absalutna ščyra chaču skazać: ja ŭžo nie ŭ tym uzroście, kali ludzi kidajucca, robiać krutyja, rezkija pavaroty i hetak dalej. Pa-pieršaje, prabačcie za niaścipłaść, ja maju niejki palityčny vopyt, nie tolki bahaž, jon taksama za plačami jość. Ja ŭžo hetaha nahledzieŭsia, bačyŭ roznyja pieramovy, vioŭ ich», — skazaŭ Łukašenka.
«Mnie ŭsio heta viadoma i, kab, viedajecie, hałava zakružyłasia… Ad čaho, ułasna, hałava ŭ mianie zakružyłasia? Ad taho, što mianie paprasili, mnie daručyli ŭrešcie arhanizavać heta mierapryjemstva? — skazaŭ kiraŭnik dziaržavy. — Boh z vami, ja nie pierabolšvaju tut rolu Biełarusi i svaju rolu, jak zvyčajna. Nie pierabolšvaju».
«Tamu, kali vy dumajecie, što heta pryčyna mnie kudyści paviarnucca — vykińcie heta z hałavy. Hetaha, pa-pieršaje, nikoli nie budzie. Pa-druhoje, ščyra kažu, mianie i nie zaprašajuć i tam nie čakajuć. A pa-treciaje, my ž z vami ruskija ludzi. Pra što havorka, my z vami ludzi, jakija naradzilisia na adnoj ziamli, u nas jość supolnaja historyja. U nas supolnyja pohlady. I, napeŭna, niemałavažna, jak by vy tam ni dumali pra našy adnosiny, z prezidentam Rasii my siabry, nie tolki braty rodnyja, ale i siabry. Voś z hetaha i sychodźcie», — adznačyŭ Łukašenka.
Blic-intervju prahramie «Viesti v subbotu» kiraŭnik dziaržavy daŭ paśla zaviaršeńnia mierapryjemstvaŭ u miežach sustrečy na vyšejšym uzroŭni ŭ «narmandskim farmacie», jakaja prajšła ŭ Minsku 11—12 lutaha. Intervju budzie pakazanaje siońnia viečaram u efiry telekanałaŭ «Rośsija 1» i «Rośsija 24».
