RF i Pucin nikoli nie buduć vykonvać nijakija damoŭlenaści, adznačyŭ siońnia u svaim Facebook kiraŭnik ukrainskaj nacyjanalistyčnaj arhanizacyi «Pravy Siektar» Dmytro Jaraš, kamientujučy vyniki pieramoŭ u Minsku.
Jaraš, jaki papraŭlajecca paśla ranieńnia (u čornym švedary ŭ centry), na adnoj z baz PS 9 lutaha. Fota z fejsbuka
U toj ž čas Jaraš zajaviŭ, što nie varta paddavacca piesimizmu adnosna pieramoŭnaha pracesu.
«Prezident Ukrainy robić na mižnarodnaj arenie ŭsio mahčymaje, nie treba kryčać pra kapitulacyju… Ja b paraiŭ Piatru Alaksiejeviču ŭsio ž sprabavać dałučyć da pieramoŭ ZŠA i Vialikabrytaniju. Hetyja dziaržavy, u adroźnieńni ad Francyi i Niamieččyny, pravodziać paśladoŭnuju antykramloŭskuju palityku», — napisaŭ lidar samaj bujnoj arhanizacyi ŭkrainskich nacyjanalistaŭ.
Jaraš uznačalvaje taksama Dobraachvotnicki ukrainski korpus Pravaha Siektaru (DUK PS), jaki, zhodna ź jahonymi zajavami na hetym tydni, dasiahnuŭ kolkaści ŭ 10 000 čałaviek u jahonych bajavych i reziervovych adzinkach.
Adnosna situacyi na froncie jon, majučy na ŭvazie bai pad Debalcavam, dzie rasijskija bajeviki nie pieršy tydzień sprabujuć uziać ukraincaŭ u atačeńnie, zaznačyŭ, što, mahčyma, nie varta trymacca za vyznačanyja palitykami punkty na mapie.
«U sučasnaj vajnie nieabchodny pastajanny manieŭr siłami i srodkami… Treba było daŭno padrychtavać skaračeńnie linii frontu i ŭ vypadku pahrozy atačeńnia advieści našy vojski», — zaznačyŭ Jaraš.
Jon taksama vykazaŭ spadziavańnie, što ŭkrainskija ŭłady nie mieli na ŭvazie častki DUK PS i inšyja nieaficyjnyja ŭkrainskija bajavyja atrady, kali padpisvalisia pad punktam pra «razzbrajeńnie niezakonnych farmavańniaŭ» u Minsku, i ŭ advarotnym vypadku heta budzie hrać na ruku Pucinu i destabilizavać situacyju va Ukrainie.
