Pieršy namieśnik staršyni ruchu «Za Svabodu» ciaham adnaho ź lutaŭskich dzion vyprabuje siabie na vajskovaj słužbie. Juraś Hubarevič padaŭ zajaŭku na ŭdzieł u prajekcie Vajennaj akademii, infarmahienctva Ministerstva abarony «Vajar» i partała Tut.by «Chaču ŭ armiju», paviedamlaje pres-słužba ruchu.
Dla ŭdziełu ŭ prajekcie budzie adabrana dziesiać dobraachvotnikaŭ, jakija ciaham adnaho ŭ Vajennaj akademii projduć praz armiejskija fizičnyja i razumovyja vyprabavańni, anansujuć arhanizatary prajekta.
Jaho videaviersija budzie prezientavana 23 lutaha, kali ŭ Biełarusi adznačajecca Dzień abaroncy Ajčyny. Juraś Hubarevič kaža, što hetuju datu adznačaje, ale nie jak savieckaje military-śviata, a jak ułasny dzień narodzinaŭ.
Uziać udzieł u prajekcie mohuć tyja, chto nie słužyŭ u vojsku. Pryčym u zajaŭcy treba patłumačyć – čamu.
Adzin z kiraŭnikoŭ Ruchu raspavioŭ takija akaličnaści:
«U vojsku nie słužyŭ, bo mieŭ adterminoŭku ŭ suviazi z atrymańniem vyšejšaj adukacyi. Skončyŭ palitechničnuju akademiju ŭ Minsku, zatym Akademiju dziaržaŭnaha kiravańnia pry prezidencie Ukrainy ŭ Lvovie. Paśla hetaha byŭ abrany deputatam Biełaaziorskaha haradskoha Savieta».
Datyčna matyvacyi da ŭdziełu ŭ prajekcie Juraś Hubarevič patłumačyŭ, što choča «na ŭłasnyja vočy, znutry, ubačyć, što ź siabie ŭjaŭlaje padrychtoŭka ciapierašniaha biełaruskaha vojska, ci hatovyja sałdaty i kamandziry da abarony Biełarusi ŭ vypadku lubych formaŭ vajennaj ahresii». «U tym liku z boku krainaŭ, jakija pryniata ličyć siabroŭskimi», – dadaje Hubarevič.
