Minski matorny zavod (MMZ) moža pačać pastaŭki ruchavikoŭ ukrainskamu Kramiančuhskamu aŭtamabilnamu zavodu (KrAZ), jaki robić akramia hramadzianskaj i techniku dla ŭkrainskaj armii i Nacyjanalnaj hvardyi dla vykarystańnia ŭ bajavych dziejańniach suprać rasijskich bajevikoŭ na Danbasie, paviedamili aficyjnyja krynicy z abodvuch bakoŭ.
U 2015 hodzie KrAZ płanuje atrymać tolki ad Minabarony Ukrainy zamovu na bolš čym 500 aŭtamabilaŭ, u tym liku braniravanych. Da vajny zavod vyrablaŭ prykładna 1.000 ciažkich i siarednich aŭtamabilaŭ roznaha pryznačeńnia ŭ hod. U hetym hodzie - 1.800 mašyn.
Braniravany aŭtamabil Spartan KrAZ.
Ładnuju častku hetaha «piraha» moža atrymać Minski aŭtamabilny zavod, skazaŭ u intervju biz.liga.net kiraŭnik KrAZ Raman Černiak. Pryčyna — da vajny KrAZ vykarystoŭvaŭ ruchaviki rasijskaha Jarasłaŭskaha matornaha zavoda, adnak zaraz JAMZ atrymaŭ z Maskvy zabaronu na supracu z ukraincami.
«Dla nas heta nie prablema. My zamaŭlali na JAMZ kožny miesiac 200 ruchavikoŭ. Toj ž Minski matorny zavod, Deutz, Cummins, Daimler, Fiat, WEICHAI i h.d. z zadavalnieńniem dla nas hetyja abjomy zrobiać», — adznačyŭ Černiak u intervju biz.liga.net.
Amal u toj ž čas pra kantakty z KrAZam paviedamili i biełarusy.
«Naš zavod praciahvaje šukać novych pakupnikoŭ svajoj pradukcyi… Padčas pieramovaŭ ukrainski bok prajaviŭ intares da našych ruchavikoŭ D-260.12Je2 (Eŭra-2) mahutnaściu 250 k.s, seryi D-263Je5 (Eŭra-5) mahutnaściu 330 i 360 k.s. U vyniku pradstaŭnikami abodvuch pradpryjemstvaŭ składzieny pratakoł namieraŭ, u jakim akreślenyja nakirunki raźvićcia supracoŭnictva. Pratakoł zaćvierdžany techničnymi kiraŭnikami MMZ i KrAZ», - śviedčyć i sajt MMZ.
KrAZ-6322 RA z ruchavikom 330 k.s.
KRAZ vypuskaje braniravanyja aŭtamabili Spartan i Kuhuar, Shrek One, Vachta, a taksama aŭtamabilnyja šasi dla techniki radyjoelektronaj baraćby, dla rakietnych sistem załpavaha ahniu Hrad i Urahan, inšuju specyjalizavanuju i prosta hramadzianskuju techniku.
Z techniki vajennaha pryznačeńnia rasijskija ruchaviki vykarystoŭvalisia na Shrek One, mašynach na bazie KrAZ-6322, braniravanych aŭtamabilach Vachta i inšych.
Całkam praduktovy šerah KrAZ možna pahladzieć na staroncy zavoda