Skandalny materyjał pra transseksuałaŭ źnik z sajta haziety «Viačerni Mahiloŭ». Taksama niedastupnaj stała nie mienš vostry i sprečny artykuł pad zahałoŭkam «Śniatsia ludiam inohda hołubyje horoda. Sobierutsia hołubyje i ujedut navsiehda». Hałoŭnaja redaktarka «Viačorki» Nadzieja Leŭčanka patłumačyła situacyju.
Pavodle jaje słoŭ, u dadzieny momant stvarajecca novy sajt, adbyvajecca rearhanizacyja staroha, tamu archiŭ publikacyj častkova niedastupny. Abodva materyjały adnosiacca da roznych vypuskaŭ haziety — №7 i №136, i da astatnich tekstaŭ numaroŭ dostup jość. Nadzieja Leŭčanka skazała, što ŭsio heta źviazana z rearhanizacyjaj resursu.
«Materyjały stanuć dastupnyja, kali my skončym pracu nad sajtam. My robim jaho svaimi siłami, tamu dakładnych terminaŭ, kali rearhanizacyja skončycca, niama», — padkreśliła jana. Surazmoŭca taksama dadała, što novaja viersija sajta stanie bolš pryvabnaj vonkava i źmienicca ŭnutrana.
Nahadajem, publikacyi haziety pra transseksuałaŭ i razvahi pra hiej-kulturu, hiej-supolnaści vyklikali šyroki rezanans u hramadstvie i miedyja-asiarodździ. U dačynieńni da sudździ Mahiloŭskaha rajonnaha suda Stanisłava Leŭčanki, jaki zališnie «ščyra» raspavioŭ vydańniu «Viačerni Mahiloŭ» pra sud nad transseksuałam, pravodzicca dyscyplinarnaja pravierka.
