Ukrainski bajec u zimovym kamuflažy
Ukrainskija žaŭniery adbili viosku Łohvinava i takim čynam razbłakavali trasu Arciomaŭsk — Debalcava, napisaŭ udzień u čaćvier u svaim Facebook kamandzir dobraachvotnickaha bataljona «Danbas» Siamien Siamienčanka.
Šaša, jakaja prachodzić praz Łohvinava, źjaŭlajecca asnoŭnaj kamunikacyjaj, pa jakoj išło zabieśpiačeńnie ŭkrainskaj armiejskaj hrupoŭki ŭ horadzie Debalcava i vakoł jaho, pra atačeńnie jakoj nieadnarazova zajaŭlali rasijskija bajeviki tak zvanych «ŁNR» i «DNR».
«Zastalisia niaznačnyja ačahi supracivu, jakija zaraz zadušvajucca. Častki bataljona «Danbas» pravodziać začystku pasiołka i adrezka trasy pobač ź im», — dadaŭ Siamienčanka.
Debalcava — važny punkt na trasie, jakaja złučaje Łuhansk i Danieck, čyhunačny vuzieł. Ukrainskija vojski ŭziali Debalcava padčas maštabnaha nastupu letam minułaha hoda, jaki pahražaŭ całkam źniščyć rasijskich bajavikoŭ na Danbasie. Adnak masiravanaja dapamoha bajavikam z RF technikaj i rehularnymi častkami armii ŭ druhoj pałovie žniŭnia 2014 hoda spyniła hety nastup i ŭ niekatorych rajonach adkinuła ŭkrainskija vojski nazad.
«Situacyja ŭ rajonie Łohvinava na trasie Arciomaŭsk — Debalcava ŭvieś čas mianiajecca, — napisaŭ Siamienčanka ŭ FB kala 18.20. — Začystka Łohvinava i navakolla častkaj bataljona «Danbas» była prypynienaja paśla adychodu častak Uzbrojenych siłaŭ z braniatechnikaj z pasiołka Łohvinava.
Praciŭnikam byŭ naniesieny kontrudar z vykarystańniem braniahrupy ź siami tankaŭ (padyšło padmacavańnie).
U hety momant siły ATA i praciŭnik manieŭrujuć. Boj praciahvajecca na vakolicach pasiołka z narastajučaj lutaściu.
Budu paviedamlać pra raźvićcio padziej.
P.S. Bitva idzie jak kala Łohvinava, tak i kala nasielenaha punkta Nižnie-Łazavoje (prasiołkavaja daroha Debalcava—Łuhanskaje)», — piša Siamienčanka.
Zhodna ź minskimi damoŭlenaściami, ahoń pavinien być spynieny ad 15 lutaha, niadzieli.
Siońnia prajšła infarmacyja, što rasijska-ŭkrainskuju miažu pierasiakła vializnaja kałona sistem załpavaha ahniu i tankaŭ.
Rasii treba kantrol nad Debalcavam, bo kantrol nad čyhunkaj tut robić mahčymym ekspart pradukcyi pramysłovych pradpryjemstvaŭ Daniecka ŭ RF čyhunačnym šlacham.