Prezidyum Savieta Ministraŭ siońnia na pasiadžeńni adobryŭ Nacyjanalnuju stratehiju ŭstojlivaha sacyjalna-ekanamičnaha raźvićcia Biełarusi na pieryjad da 2030 hoda.
Dakumient byŭ padtrymany. U čas pasiadžeńnia pastupili prapanovy, z ulikam jakich jon budzie jašče dapracavany, a potym zaćvierdžany pastanovaj Saŭmina.
Adkryvajučy pasiadžeńnie, premjer-ministr Andrej Kabiakoŭ adznačyŭ, što pierad aŭtarami stratehii stajała zadača ŭličyć u joj suśvietnyja tendencyi, jakija abumoŭlivajuć ryzyki dla ŭstojlivaha raźvićcia krainy. Majucca na ŭvazie i źmianieńni cen na enierhanośbity, z
apavoleńnie tempaŭ rostu suśvietnaj ekanomiki, źmianieńni klimatu. «My pavinny ŭličvać, što istotna źmieniacca i ŭnutranyja ŭmovy. Naprykład, budaŭnictva atamnaj elektrastancyi paŭpłyvaje na bałans enierhasistemy. Nieabchodna praduhledzieć mahčymaści efiektyŭnaha vykarystańnia ŭvodzimych enierhietyčnych mahutnaściej, stvareńnia źviazanych z hetym pramysłovych vytvorčaściej i inšych abjektaŭ spažyvańnia i nazapašvańnia enierhii ŭ hadziny minimalnych nahruzak», — skazaŭ premjer-ministr. Da važnych pytańniaŭ adnosicca stratehija rehijanalnaha raźmiaščeńnia pradukcyjnych sił, zabieśpiačeńnie nacyjanalnaj biaśpieki ŭ ekanamičnaj, demahrafičnaj, ekałahičnaj i inšych śfierach, dadaŭ Andrej Kabiakoŭ.
«Pryjarytet u raźvićci ekanomiki pavinien być nakiravany na stvareńnie vytvorčaściej na asnovie miascovych resursaŭ, u tym liku ŭ składzie Jeŭrazijskaha ekanamičnaha sajuza - u JEAES vytvorčaść pradukcyi z vysokaj dabaŭlenaj vartaściu pa poŭnym technałahičnym cykle», — skazaŭ kiraŭnik urada.
Pradstaŭlajučy dakumient, ministr ekanomiki Uładzimir Zinoŭski adznačyŭ, što ŭ dakumiencie stratehičnyja pryjarytety doŭhaterminovaha raźvićcia vybudoŭvalisia pa troch asnoŭnych kampanientach — čałaviek, ekanomika, ekałohija. Pavodle jaho słoŭ, treba budzie raspracavać dziejsnyja miechanizmy pa dalejšym pavyšeńni ŭzroŭniu naradžalnaści nasielnictva, palapšeńni jaho zdaroŭja, źnižeńni śmiarotnaści. Daviadziecca vyrašyć ambicyjnuju zadaču - uvajści ŭ pieršyja 40 krain ź vielmi vysokim uzroŭniem čałaviečaha raźvićcia. U 2013 hodzie Biełaruś zajmała 53-je miesca siarod 187 krain suśvietnaj supolnaści pa indeksie čałaviečaha raźvićcia.
Stratehija praduhledžvaje dva etapy. Na pieršym, u 2016-2020 hadach, čakajecca pierachod da zbałansavanaha rostu ekanomiki na asnovie jaje strukturnaj transfarmacyi z ulikam pryncypaŭ ekałahičnaści, pryjarytetaŭ raźvićcia vysokatechnałahičnych vytvorčaściej. Druhi etap — heta 2021-2030 hady. Hałoŭnaja jaho meta - padtrymańnie ŭstojlivaści raźvićcia, u asnovie jakoha pavyšeńnie jakaści čałaviečaha patencyjału, paskoranaje raźvićcio navukajomistych vytvorčaściej i pasłuh, dalejšaje stanaŭleńnie zialonaj ekanomiki.
Čakanymi vynikami realizacyi namiečanych stratehijaj zadač pavinny stać pavieličeńnie praciahłaści žyćcia da 77 hadoŭ, rost VUP za 2016-2030 hady ŭ paŭtara-dva razy, rost udzielnaj vahi zatrat na achovu navakolnaha asiarodździa da 2-3 pracentaŭ da VUP u 2030 hodzie.
Nacyjanalnaja stratehija ŭstojlivaha raźvićcia Biełarusi da 2030 hoda budzie vykarystoŭvacca respublikanskimi orhanami dziaržkiravańnia, abłvykankamami i Minskim harvykankamam u jakaści asnovy dla raspracoŭki siarednieterminovych prahram i hadavych prahnozaŭ sacyjalna-ekanamičnaha raźvićcia Biełarusi, a taksama prahramy prahnozaŭ raźvićcia administracyjna-terytaryjalnych adzinak.
