Rasijski prezident Uładzimir Pucin zajaviŭ, što abrany ŭładami Ukrainy šlach vyrašeńnia situacyi na ŭschodzie krainy tupikovym, jaki pahradaje vialikaj katastrofaj.
Klučavoj umovaj dla pačatku stabilizacyi situacyi jon nazvaŭ spynieńnie Kijevam vajennaj apieracyi ŭ Danieckaj i Łuhanskaj abłaściach i admova ad sprob ekanamična błakavać Danbas.
«Najvažniejšaj umovaj stabilizacyi situacyi źjaŭlajecca nieadkładnaje spynieńnie ahniu, tak zvanaj antyterarystyčnaj, a pa sutnaści karnaj apieracyi na paŭdniovym uschodzie Ukrainy», - skazaŭ Pucin u intervju jehipieckaj štodzionnaj haziecie «Al-Achram» napiaredadni svajho vizitu ŭ Kair.
Jon taksama padkreśliŭ, što «sproby Kijeva akazvać ekanamičny cisk na Danbas, błakavać jaho žyćciadziejnaść tolki ŭskładniajuć situacyju».
«Heta tupikovy šlach, jaki pahražaje vialikaj katastrofaj», - ličyć rasijski lidar.
U niadzielu stała viadoma, što na sieradu ŭ Minsku namiečana sustreča lidaraŭ Ukrainy, Rasii, Hiermanii i Francyi dla pošuku vychadaŭ ź situacyi. Pavodle najaŭnych źviestak, baki majuć namier abmierkavać płan ŭrehulavańnia, prapanavany Uładzimiram Pucinym. Detali hetaha płana nie vydajucca.
U intervju jehipieckaj haziecie Pucin daŭ zrazumieć, što ličyć nieabchodnym znajści «novuju formułu kanstytucyjnaha ładu susiedniaj dziaržavy».
Hramadstva pavinna kansalidavacca vakoł pazityŭnych kaštoŭnaściaŭ i sapraŭdnych intaresaŭ Ukrainy, miarkuje prezident Rasii.
«Dla hetaha treba, kab ułady ŭ Kijevie pačuli svoj narod. Znajšli ahulnuju movu i damovilisia z usimi palityčnymi siłami i rehijonami krainy. Vypracavali b takuju formułu kanstytucyjnaha ładu dziaržavy, pry jakoj było b biaśpiečna i kamfortna žyć usim hramadzianam, u poŭnym abjomie vykonvalisia b pravy čałavieka», — dadaŭ prezident….
