Sustaršyni arhkamiteta pa stvareńni partyi «Biełaruskaja chryścijanskaja demakratyja» Paŭłu Sieviaryncu viernuć zatrymanyja na mytni knihi Zianona Paźniaka. Ab hetym paviedamiła pres-słužba BCHD.
Viečaram 13 kastryčnika 2014 hoda Sieviarynca zatrymali na pahraničnym pierachodzie «Bruzhi», kali jon viartaŭsia ź Biełastoka (Polšča).
Paśla pradjaŭleńnia pašparta Sieviarynca paviali na asabisty ahlad i kanfiskavali šerah knih Zianona Paźniaka.
Paśla dvuch zvarotaŭ niepasredna na punkt propusku «Bruzhi» i ŭ Hrodzienskuju rehijanalnuju mytniu Pavieł Sieviaryniec 6 lutaha atrymaŭ adkaz, padpisany namieśnikam načalnika mytni. U adkazie paviedamlajecca, što śpiecyjalnaja kamisija praviała ekśpiertyzu knih Paźniaka na «pradmiet najaŭnaści prykmiet ekstremizmu» (ekśpiertnaje zaklučeńnie ad 28.01.2015) i vyznačyła, što ŭ hetaj litaratury prykmiet ekstremizmu niama.
Praŭda, Hrodzienskaja mytnia ŭdakładniaje: z 26 knih uładalniku viernuć tolki 25. Kniha «Tera Dej» znachodzicca na ekśpiertyzie.
«Dziakuj Bohu, narešcie pryjšoŭ adkaz, pryčym pa-biełarusku, na movie zvarotu. Dobra, što ŭ orhanaŭ chapiła rozumu nie prydumvać «prykmiet ekstremizmu» ŭ knihach Zianona Paźniaka.
Projdzie čas, i knihi Zianona buduć vyvučać biełaruskija školniki, a nie ekśpierty kamisii pa ekstremiźmie. Nu, a nakont knihi «Tera Dej», napeŭna, jana asabliva spadabałasia čytačam z kamisii. Budu pisać asobnuju zajavu, kab jaje viarnuli», — prakamientavaŭ sustaršynia BCHD.
