Ad sankcyj Raśsielhasnahladu biełaruskija pradpryjemstvy stracili zvyš za $100 młn, zajaviŭ žurnalistam 2 lutaha ŭ Minsku ministr sielskaj haspadarki i charčavańnia Leanid Zajac.
Nahadajem, z kastryčnika 2014 hoda Raśsielhasnahlad uvioŭ zabaronu na pastaŭki pradukcyi bolš čym 20 biełaruskich miasa-małočnych pradpryjemstvaŭ. Rasijskaje viedamstva vyjaviła ŭ biełaruskich tavarach niebiasškodnyja mikroby, antybijotyki i hienom virusa afrykanskaj čumy śviniej.
U śniežni 2014 hoda paśla pravierak abmiežavańni na pastaŭki pradukcyi ŭ Rasiju z bolšaj častki biełaruskich pradpryjemstvaŭ byli źniaty. Vyklučeńnie skłali dzieviać miasakambinataŭ, u pradukcyi jakich byŭ vyjaŭleny hienom virusa AČS.
Na minułym tydni śpiecyjalisty Raśsielhasnahladu praviali aŭdyt čatyroch ź dzieviaci takich miasakambinataŭ. «Pa vynikach manitorynhu našych pradpryjemstvaŭ 3 lutaha ŭ Maskvie na placoŭcy Jeŭrazijskaj ekanamičnaj kamisii projduć pieramovy, dzie budziem abmiarkoŭvać pytańnie dazvołu pastavak našaj pradukcyi na rasijski rynak. Razmova idzie ab jałavičynie, usia inšaja pradukcyja pastaŭlajecca», — paviedamiŭ Leanid Zajac.
Ministr aceńvaje pierśpiektyvy poŭnaha źniaćcia zabarony na pastaŭki biełaruskaha charčavańnia ŭ Rasiju jak «samyja stanoŭčyja».
Treba adznačyć, što 11 śniežnia na naradzie pa pytańniach raźvićcia ekanomiki Alaksandr Łukašenka ŭskłaŭ adkaznaść za charčovy kanflikt na rasijski bok. «Ja chacieŭ by paraić razumnym rasijskim palitołaham i žurnalistam šukać pryčynu nie ŭ Biełarusi, a šukać jaje dzieści tam, u Maskvie. Ale heta ich prablema», — padkreśliŭ jon.
«Nam prosta niavyhadna, nam heta nie treba. Nie my byli pryčynaj takoha kanfliktu. Bo ŭsie etapy byli projdzieny, pačynajučy ad pieramoŭ ź piatrovymi, ivanovymi, dankviertami, z uradam Rasijskaj Fiederacyi, nu, apošniaja ŭžo stupień — prezidenty. Tamu paprakać biełarusaŭ niama čaho ŭ tym, što hety skandał, kali jaho možna tak nazvać, vybuchnuŭ», — zajaviŭ Łukašenka.
Pry hetym jon nahadaŭ, što kanflikt pa pastaŭkach charčavańnia pamiž Rasijaj i Biełaruśsiu ŭźnik «nie pieršy raz».
