Sudovaja kalehija pa kryminalnych spravach Bresckaha abłasnoha suda na vyjaznym pasiadžeńni ŭ Baranavičach 26 studzienia vyniesła pryhavor 31-hadovamu miascovamu žycharu za zabojstva piacimiesiačnaha dzicia svajoj znajomaj.
Jak paviedamiŭ namieśnik načalnika adździeła prakuratury Bresckaj vobłaści Alaksandr Žaško, jaki padtrymlivaŭ dziaržaŭnaje abvinavačańnie pa spravie, viečaram 16 maja 2014 hoda ŭ Baranavičach mužčyna ŭ niećviarozym stanie pryjšoŭ u hości ŭ adzin ź internataŭ horada, dzie žyła jaho znajomaja ź siamihadovaj dačkoj i piacimiesiačnym synam.
Razam z maci dziaciej i chrosnaj chłopčyka jany raśpivali śpirtnyja napoi. Kali maci z dačkoj i chrosnaj pajechali na taksi, kab uziać u toj doma jašče śpirtnoha, mužčyna zastaŭsia ŭ pakoi. Jon hladzieŭ televizar, piacimiesiačny chłopčyk spaŭ u łožku. Sychodziačy, maci začyniła ŭvachodnyja dźviery dvuchpakajovaha błoka.
Viarnuŭšysia ŭ internat, jana vyjaviła, što dźviery adčynienyja, dziciaci ŭ pakoi niama, a mužčyna śpić. Žančyny razbudzili hościa, jaki zajaviŭ, što nieviadomy zajšoŭ u pakoj i zabraŭ dzicia. Vyklikanyja supracoŭniki milicyi znajšli pad voknami internata miortvaha chłopčyka sa šmatlikimi pierałomami kaściej zvodu asnovy čerapa.
17 maja mužčyna, jaki prychodziŭ u hości, byŭ zatrymany pavodle padazreńnia ŭ zabojstvie dziciaci. Orhanami papiaredniaha śledstva ŭstanoŭlena, što 17 maja pamiž 0.40 i 1.50 jon vykinuŭ chłopčyka z bałkona, raźmieščanaha na piatym paviersie internata. Praviedzienaj stacyjanarnaj sudovaj psichołaha-psichijatryčnaj ekśpiertyzaj jakich-niebudź psichičnych adchileńniaŭ u abvinavačanaha nie vyjaŭlena.
Sudovaja kalehija pa kryminalnych spravach Bresckaha abłasnoha suda pryznała mužčynu vinavatym u zabojstvie zaviedama małaletniaha, jaki znachodziŭsia ŭ biezdapamožnym stanie (p. 2 č. 2 art. 139 KK), i pryhavaryła da 15 hadoŭ pazbaŭleńnia voli z adbyvańniem pakarańnia ŭ papraŭčaj kałonii ŭzmocnienaha režymu. Zhodna z prysudam ź jaho spahnana 70 młn rubloŭ na karyść maci zabitaha dziciaci.
«U sudovym pasiadžeńni abvinavačany svaju vinu nie pryznaŭ i zajaviŭ, što nie maje dačynieńnia da hetaha złačynstva», — skazaŭ Žaško.
Pryhavor pakul nie nabyŭ moc i moža być abskardžany. Raniej mužčyna sudzimy nie byŭ, pracavaŭ na miascovym pradpryjemstvie.
