Tłuščavyja kletki dapamahajuć skury abaraniacca ad bakteryj — pra hetaje adkryćcio paviedamili daśledčyki Škoły miedycyny San-Dyjeha.
Ryčard Hała, prafiesar dermatałohii, vyjaviŭ raniej nieviadomuju rolu adypacytaŭ — tłuščavych kletak padskurnaj klatčatki. Jany vypracoŭvajuć antymikrobnyja pieptydy, jakija dapamahajuć adbivacca ad ŭvarvańnia patahiennych mikraarhanizmaŭ.
«Ličyłasia, što na ŭzłom barjeru skury arhanizm adkazvaje praź biełyja kryvianyja kletki — niejtrafiły i makrafahi, ale taki adkaz zajmaje peŭny čas: lejkacytam treba daviedacca pra paškodžańnie i padciahnucca da miesca padziej. Sistema abarony cieła ad mikraarhanizmaŭ — składany šmatuzroŭnievy miechanizm. Ale ž mikroby čakać nie buduć — jany imhnienna pačynajuć pamnažacca, što pahražaje arhanizmu sepsisam.
I tut niečakana vyjaviłasia, što za pieršuju liniju abarony adkaznyja razam z epitelijalnymi i tłuščavyja stvałavyja kletki.
Jany mohuć vyrablać supraćmikrobnyja rečyvy, i ichni ŭniosak u baraćbu paraŭnalny ź niejtrafiłami dy makrafahami — śpiecyjalizavanymi kletkami, jakija metaskiravana pažyrajuć varožyja ahienty.
Nazirajučy myšej, jakim uvodzili ŭ skuru załacisty stafiłakok, Lin Čžan, doktar fiłasofii, pieršy aŭtar artykuła, vyjaviŭ značnaje pavieličeńnie praź niekalki hadzin jak kolkaści i pamieraŭ tłuščavych kletak u miescy infiekcyi, tak i ŭzroŭniu antymikrobnaha pieptyda katelicidzina, malekuły jakoha ŭdzielničajuć u pryrodžanym imunnym adkazie, niepasredna zabivajučy invaziŭnyja bakteryi, virusy, hrybki i inšyja chvarobatvornyja mikraarhanizmy.
Dalejšyja testy paćvierdzili, što adypacyty čałavieka taksama vyrablajuć katelicydzin: padobna, što imunny adkaz źjaŭlajecca adnolkavym jak u hryzunoŭ, tak i ŭ čałavieka.
Vyhladaje, što deficyt padskurnaha tłušču moža być adnoj z pryčyn častych skurnych infiekcyj. U toj ža čas i lišak tłušča kiepska ŭpłyvaje na stan zdaroŭja.
«Heta jašče adna častka zabłytanaj hałavałomki čałaviečaha imunitetu. Nam adkrylisia novyja fantastyčnyja mahčymaści dla daśledavańnia. Naprykład, ciapier preparaty, pryznačanyja dla chvorych na cukrovy dyjabiet, mohuć być karysnymi dla padvyšeńnia imunitetu skury. I naadvarot, hetyja vyniki mohuć dapamahčy navukoŭcam zrazumieć chvaroby-spadarožniki atłuścieńnia i raspracoŭvać novyja stratehii aptymizacyi lačeńnia».
