Incydent na staličnaj vulicy Mirašničenki ŭ mikrarajonie Zialony Łuh, dzie na parenčach bałkona doma № 6 znachodziŭsia małady čałaviek, jaki pahražaŭ saskočyć uniz ź dziaviataha paviercha, zaviaršyŭsia dobra. Pradstaŭniki ekstrannych słužbaŭ uhavaryli chłopca nie ździajśniać suicyd.
Nie vyklučana, što sproba saskočyć z bałkona była nie adzinaj sprobaj suicydu: zapiaści ŭ chłopca, jakoha pieradali miedykam, byli pieramatanyja akryvaŭlenymi impravizavanymi bintami.
Raniej adzin z supracoŭnikaŭ milicyi paviedamiŭ, što małady čałaviek źbirajecca skončyć žyćcio samahubstvam «z-za prablem ź dziaŭčynaj».
Jak paviedamiła žurnalistam vidavočca zdareńnia Julija, jana vynosiła śmiećcie i pačuła, što na ahulnym bałkonie chtości znachodzicca. Dziaŭčyna paprasiła svajho maładoha čałavieka, Dźmitryja, vyjści i pravieryć, chto na bałkonie. Pa słovach apošniaha, jon vyjšaŭ na bałkon i ŭbačyŭ chłopca, jaki siadzieŭ na parenčach. Dźmitryj zaŭvažyŭ, što «małady čałaviek byŭ vidavočna ŭ nieadekvacie». Paśla hetaha jon patelefanavaŭ u MNS. Prybyli pradstaŭniki ekstrannych słužbaŭ, jakija pačali pieramovy z čałaviekam, što źbiraŭsia skoknuć uniz. Pry hetym Dźmitryj zastavaŭsia ź im pobač, pakolki, pavodle jaho słoŭ, chłopiec «jamu daviaraŭ, prasiŭ u jaho vady i zakuryć». Jak skazaŭ Dźmitryj, małady čałaviek «žyvie niedzie ŭ susiednich damach».
Adzin ź miedykaŭ paviedamiŭ, što chłopca paśla akazańnia jamu nieabchodnaj miedycynskaj dapamohi dastaviać na ahlad da psichijatraŭ.
Nie vyklučana taksama, što paśla nieabchodnych pracedur chłopcu mohuć vystavić rachunak za pracu ekstrannych słužbaŭ, a taksama pryznačyć administracyjnaje pakarańnie.
