Znakamity klatčasty prynt daŭno staŭ simvałam Anhlii. Siarod prychilnikaŭ kletki Somierset Moem, Artur Konan Dojł, Redjard Kiplinh, Biernard Šoŭ, Uinstan Čerčyl, Marlen Dzitrych, Džejn Fonda, Ronald Rejhan, pryncesa Dyjana, karaleva Elizavieta i prync Čarlz, Kiejt Mos, Viktoryja Bekchem, Dženifer Enistan, Liŭ Tajler, Ema Uotsan.
U trenčkoty Burberry byli apranutyja hieroi sieryjałaŭ «Kałomba» i «Puaro Ahaty Kryści», piersanažy znakamitych filmaŭ «Kasabłanka» i «Śniadanak u Cifani».
Krychu historyi. Burberry — brytanskaja kampanija, vytvorca adzieńnia, aksesuaraŭ i parfumieryi kłasa luks. Stvorana ŭ 1856 h. u Chempšyry. Tomas Barbiery pačaŭ svaju karjeru z pamočnika pradaŭca tkaniny, paśla adkryŭ svaju maleńkuju kramu i ŭłasnaručna pačaŭ šyć vopratku. U 1879 h. Tomas vynachodzić habardzin, materyjał ź ilnianoj tkaniny i bavaŭnianaj pražy, jaki dychaje, ale pry hetym nie prapuskaje vadu. Niepramakalny płašč z habardzinu stanovicca miehapapularnym. U 1924 h. na vopratcy źjaŭlajecca znakamitaja klatčastaja podšyŭka. U 1955 h. modnamu domu było prysvojena zvańnie aficyjnaha pastaŭščyka Jaje Vialikaści karalevy, a ŭ 1989 h. — Jaho Vysokaści prynca Valijskaha. U 2006 h. marka Burberry adznačyła svajo 150-hodździe. Siońnia Burberry — adna z samych pavažanych marak adzieńnia i aksesuaraŭ premium-kłasa mižnarodnaha ŭzroŭniu.
Treba adznačyć, što patencyjał klatčastaha ŭzoru byŭ vidavočna niedaacenieny. Kletka ścipła źjaviłasia na niabačnym baku trenčkotaŭ, ale tak spadabałasia modnikam, što jaje stali vykarystoŭvać jak samastojny materyjał dla adzieńnia i aksesuaraŭ. Chutka jana stała bolš papularnaj za emblemu Burberry i navat pieraŭtvaryłasia ŭ vizitnuju kartku marki.
Nasamreč, mahija kletki absalutna banalnaja. Jana nahadvała ludziam tradycyjny ŭzor na anhielskich pledach, a razam ź im pra dom i ŭtulnaść. U trenčkota karani taksama nie kazačnyja — sielskahaspadarčyja. Na jaho stvareńnie natchnili vaŭnianyja płaščy-chałaty fiermieraŭ, jakija nasili hetuju vopratku jak zimoj, tak i letam. Sam trenčkot atrymaŭ svaju nazvu ad anhielskaha słova trench – tranšeja. Padčas pieršaj suśvietnaj brytanskaja armija zamoviła Burberry kala 500 000 płaščoŭ.
Tradycyjnuju kletku čakała sapraŭdy tryŭmfalnaje šeście – papularnaść jaje rasła na praciahu ŭsiaho XX st. U 1970-ch hety malunak na vopratcy i aksesuarach staŭ papularny siarod anhielskich futbolnych fanataŭ, što padniało ŭzor na zusim novy ŭzrovień, i jon staŭ adnym ź simvałaŭ Brytanii. Pik papularnaści kletki pryjšoŭsia na kaniec XX st.
Razam z pośpiecham pryjšła i prablema ŭ vyhladzie nievierahodnaj kolkaści padrobak. Kantrafaktnuju pradukcyju, što raspaŭsiudžvajecca praź internet-kramy, kampanija adsočvaje i atrymlivaje praz sud miljonnyja kampiensacyi.
Niečakana źjaviłasia pahroza asacyjalizacyi brenda. Prostyja ludzi z uskrajkaŭ Łondana, debašyry i hopniki ŭ spartovych kaściumach i kiepkach Burberry daviali situacyju da taho, što paby byli vymušanyja zabaraniać uvachod nie tolki ŭ džynsach i krasoŭkach, ale i ŭ rečach znakamitaj marki. U adkaz na heta kampanija Burberry pryniała rašeńnie spynić vytvorčaść biejsbołak z klatčastym malunkam.
Kamuści takija prablemy mohuć padacca drobnymi, bo hadavy abarot kampanii, naprykład, ŭ 2014 h. skłaŭ 2,33 młrd funtaŭ sterlinhaŭ, čysty prybytak 332,3 młn, a hiendyrektarka Burberry stała samaj bahataj žančynaj Vielikabrytanii ŭ 2013 h.
Tut samy čas pahavaryć pra svajo. Biełarusam dastałasia ŭ spadčynu vialikaja kolkaść arnamientaŭ na ručnikach i pościłkach, jakija tak i prosiacca ŭ sučasnuju modnuju vytvorčaść. Naša kletka taksama nahadvaje nam pra tradycyi i ŭtulnaść. My taksama niedaaceńvajem jaje patencyjał.
Niama pryčyny dla niedavieru. Stvaralnik kampanii Burberry i nie padazravaŭ, što mienavita kletka stanie simvałam brenda.
Kožny kvadratny santymietr našaj spadčyny zdolny stać novym brendam. My krychu spaźnilisia, zatoje schiema raźvićcia abkatanaja. Pryjšoŭ čas padniać z padłohi zołata, što nam pakinuli prodki.
