U Novaj Ziełandyi praz dva hady adbudziecca refierendum ab źmienie nacyjanalnaha ściaha, abviaściŭ premjer-ministr krainy Džon Kiej. Krytyki ciapierašniaha kažuć, što jon zanadta padobny na ściahi inšych krain, jakija raniej uvachodzili ŭ Brytanskuju impieryju.
Pracedura refierendumu projdzie ŭ dva etapy. U kancy nastupnaha hoda hramadzianie buduć vybirać novy dyzajn ściaha ź niekalkich varyjantaŭ, jakija ŭ svaju čarhu abiare kamisija ź viadomych novaziełandcaŭ.
Na druhim etapie, jaki zapłanavany na 2016 hod, žycharam krainy treba budzie vybrać, zrabić abrany hodam raniej ściah aficyjnym abo zachavać stary.
U kamitet, jaki budzie adkazvać za padrychtoŭku da refierendumu, uvojdzie pa adnym pradstaŭniku ad usich palityčnych partyj krainy.
Ciapierašni ściah Novaj Ziełandyi ŭjaŭlaje saboj siniaje pałotnišča z brytanskim «Junijon Džekam» u levaj vierchniaj čverci i čatyrma čyrvonymi zorkami ź biełaj akantoŭkaj ŭ pravaj častcy.
Pa słovach Kieja, novy ściah pavinien u bolšaj stupieni davać ujaŭleńnie ab Novaj Ziełandyi. Krytyki ciapierašniaha kažuć, što jaho lohka pierabłytać ź dziaržaŭnymi simvałami inšych byłych brytanskich kałonij — u pryvatnaści, Aŭstralii, ściah jakoj amal identyčny novaziełandskamu.
U sakaviku hetaha hoda ministr zamiežnych spraŭ Aŭstralii Džuli Bišap zajaviła, što jaje kraina nie adčuvaje vialikaj patreby ŭ źmienie nacyjanalnaha ściaha.
«Mnohija aŭstralijcy zmahalisia i hinuli pad hetym ściaham, — adznačyła jana. — Pad im my spaborničali na Alimpijadach, i ŭ nas žyvoje pačućcio honaru za hety ściah».
