U 2014 hodzie na budaŭnictva druhoj Minskaj kalcavoj aŭtadarohi praduhledžana vydzielić u ahulnaj składanaści 700 młrd rubloŭ, paviedamiŭ 22 kastryčnika na pres-kanfierencyi načalnik hałoŭnaha ŭpraŭleńnia aŭtamabilnych daroh Ministerstva transpartu i kamunikacyj Jaŭhien Rakała.
Pavodle jaho słoŭ, praduhledžany jak biudžetnyja srodki, tak i kredytnyja resursy.
«Praca idzie ŭ płanavym paradku. Uradam zaćvierdžany płan-hrafik uvodu ŭčastkaŭ druhoj MKAD. Kali nijakich inšych faktaraŭ nie budzie, to my pavinny pabudavać hetuju darohu svoječasova», — adznačyŭ Rakała.
MKAD-2 uzvodziać pa paramietrach pieršaj katehoryi, jana praktyčna ničym nie budzie adroźnivacca ad užo pryniatych u ekspłuatacyju i tych mahistralaŭ, jakija madernizujucca, u napramku da abłasnych centraŭ. Praduhledžany čatyrochpałosny ruch, pa dźvie pałasy ŭ kožnym napramku, aśviatleńnie asobnych učastkaŭ, dvuchbakovaja barjernaja aharodža z raździalalnaj pałasoj, šumaachoŭnyja ekrany blizu žyłych zabudoŭ.
Ahulnaja praciahłaść składzie pryblizna 160 kiłamietraŭ, ź ich 85 — novyja ŭčastki.
Budaŭnictva i rekanstrukcyja projduć u dva etapy. Na pieršym płanujecca ŭźviadzieńnie ŭčastku praciahłaściu pryblizna 46 km, jaki źviaža pamiž saboj viciebskuju i hrodzienskuju šašu. Hetyja raboty miarkujecca zaviaršyć da 1 studzienia 2016 hoda. Na druhim etapie budzie pabudavany ŭčastak, jaki źviazvaje hrodzienski napramak z bresckim, termin zaviaršeńnia rabot — 1 studzienia 2017 hoda.
Novyja ŭčastki MKAD-2 buduć u cemientabietonnym vykanańni.