Były «hałoŭnakamandujučy» «ŭzbrojenymi farmiravańniami» «Danieckaj narodnaj respubliki» Ihar Strałkoŭ papiaredziŭ rasijskaje kiraŭnictva ab tym, što ŭkrainskaja armija płanuje ŭ chutkim časie viarnuć Danieck, Makiejeŭku i niekalki inšych nasielenych punktaŭ, jakija kantralujucca sieparatystami.
Videazvarot Strałkova apublikavaŭ u aŭtorak, 21 kastryčnika, hramadski telekanał «Niejramir-TV».
«Kali ŭsie sabranyja ŭkrainskim bokam siły buduć adnačasova i rašuča kinutyja ŭ boj, to małalikija, słaba ŭzbrojenyja i drenna kiravanyja častki «apałčeńnia» biez pramoj rasijskaj dapamohi buduć chutka razhromlenyja, i «Navarosija» spynić svajo isnavańnie, ledź naradziŭšysia», — paviedamiŭ Strałkoŭ.
Pavodle jaho słoŭ, kijeŭskija ŭłady vyrašyli pravieści chutkuju siłavuju apieracyju, paśla jakoj abvieściać pra adnabakovaje spynieńnie ahniu i dabjucca pieramirja, «ale ŭžo na svaich umovach»
«Źviartajusia z prośbaj da pradstaŭnikoŭ usich rasijskich słužbaŭ, jakija kantralujuć umovy vykanańnia minskich pahadnieńniaŭ: źviarnuć uvahu na płany ŭkrainskich karnikaŭ i prainfarmavać prezidenta ab vierahodnych nastupstvach ich realizacyi dla ruskaha naroda Danbasa i dla Rasii», — zajaviŭ eks-hałoŭnakamandujučy ŭzbrojenymi sieparatystami «DNR».
U siaredzinie žniŭnia, paśla adstaŭki «premjer-ministra» «DNR» Alaksandra Baradaja Ihara Strałkova źniali z pasady «hałoŭnakamandujučaha ŭzbrojenymi farmiravańniami» sieparatystaŭ. Paźniej, u pačatku vieraśnia, Strałkoŭ daŭ pres-kanfierencyju ŭ Maskvie. Pa jaje vynikach jon daŭ zrazumieć, što jaho nie zadavalniaje toje, što adbyvajecca na ŭschodzie Ukrainy, dzie abviaścili pieramirje. Pry hetym Strałkoŭ vykazaŭ hatoŭnaść padparadkavacca rašeńniu prezidenta Rasii Uładzimira Pucina, jakoha sam jon ličyć «adzinym lehitymnym hałoŭnakamandujučym»
