Ekspart biełaruskich naftapraduktaŭ u žniŭni ŭ paraŭnańni ź lipieniem źniziŭsia amal na čverć, śviedčać źviestki aficyjnaj statystyki. Za vosiem miesiacaŭ 2014 hoda Biełaruś ekspartavała 9,5 młn. ton naftapraduktaŭ na 7,22 młrd. dołaraŭ.
Pry hetym asobna ŭ žniŭni na źniešnija rynki było pastaŭlena 891,5 tys. ton naftapraduktaŭ, što amal na čverć mienš u paraŭnańni ź lipieńskim abjomam ekspartu.
Treba adznačyć, što ŭ papiarednija miesiacy hetaha hoda Biełaruś štomiesiac ekspartavała bolš za 1 młn. ton naftapraduktaŭ. Tak, u studzieni na źniešnija rynki było pastaŭlena 1,24 młn. ton naftapraduktaŭ, u lutym — 1,21 młn., u sakaviku — 1,41 młn., u krasaviku — 1,19 młn., u mai — 1,24 młn., u červieni — 1,16 młn. ton, u lipieni — anałahičny abjom. Takim čynam, u žniŭni abjom ekspartu biełaruskich naftapraduktaŭ apuściŭsia da minimalnaha sioleta ŭzroŭniu.
Treba adznačyć, što ŭ žniŭni na kapitalny ramont spyniŭ bolšaść svaich mahutnaściej navapołacki naftapierapracoŭčy zavod «Naftan», jaki źjaŭlajecca adnym ź viadučych vytvorcaŭ naftapraduktaŭ.
Na fonie skaračeńnia ekspartu biełaruskich naftapraduktaŭ abjom vyvaznych pošlin na naftapradukty, pieraličanych Biełaruśsiu ŭ rasijski biudžet, u žniŭni istotna źniziŭsia (na 27,6%) u paraŭnańni ź lipieniem. Jak viadoma, ciapier Biełaruś pieraličvaje ŭ rasijski biudžet vyvaznyja mytnyja pošliny na naftapradukty, jakija vyrableny z rasijskaj nafty i ekspartujucca za miežy Mytnaha sajuza.
Miž tym na minułym tydni premjer-ministry Biełarusi i Rasii damovilisia, što ŭ 2015 hodzie ŭvieś abjom vyvaznych pošlin na naftapradukty budzie zaličvacca ŭ biełaruski biudžet.
Jak patłumačyŭ na minułym tydni pradstaŭnik Biełarusi ŭ Jeŭrazijskaj ekanamičnaj kamisii Siarhiej Rumas, u vyniku hetaha biełaruski biudžet u nastupnym hodzie moža atrymać 2,5 młrd. dołaraŭ.
«Usie raźliki pakazvajuć, što Biełaruś atrymaje ŭ 2015 hodzie akramia tych 1,5 młrd. dołaraŭ, ab jakich była dasiahnuta damoŭlenaść pry padpisańni jeŭrazijskaha dahavora ŭ mai, jašče nie mienš čym 1 młrd. dołaraŭ u suviazi sa stratami, jakija mahli b uźniknuć z-za «padatkovaha manieŭra» ŭ naftavaj halinie Rasii», — paviedamiŭ Siarhiej Rumas.