Hałoŭred Tuzin.fm adkazvaje na abvinavačvańni ŭ nizkim muzyčnym i mastackim uzroŭni prajektu «Re:Pieśniary» i sprobu skarystać imia «Pieśniaroŭ» u metach ułasnaj kamercyjnaj nažyvy.
Voś, što chaciełasia b skazać u adkaz na hety list, poŭny žoŭci, ahresii, niematyvavanych abvinavačvańniaŭ, nieabhruntavanych vypadaŭ i dzivosnych vysnovaŭ. Palemika nie ŭjaŭlajecca mahčymaj tam, dzie jość złość, nieprymańnie inšaj pazycyi ci banalnaja pomsta. Tut zastajecca tolki adno — malicca. I ja budu malicca.
Ja budu malicca, kab niebiestałannaja śpiavačka Vidava zapisała takija pieśni, jakija b karcieła pastavić/pierasłać zamiežnym siabram i z honaram paviedamić, što heta jość biełaruskaja sučasnaja muzyka. Kab vynachodlivy kampazytar Moŭčan napisaŭ jašče nie adzin tvor z takoj ža chvalujučaj i kranalnaj muzykaj na takija ž patrebnyja i nadzionnyja słovy.
Ja budu malicca, kab našyja ludzi byli adkrytyja dušoju i nastrojenyja pazytyŭna ŭsprymać novaje, niačutaje, niazvykłaje. Kab pryvatnyja inicyjatyvy ŭ našaj krainie nie vyklikali hreblivaści, źjedlivaści i nie razhladalisia jak sproba nažycca na čymści, a prymalisia jak naležnaje i stali nieadjemnaju častkaju kulturnaha pracesu. Kab kožny čałaviek tut nie adčuvaŭ svajho biaśsilla pierad systemaju. Kab nichto nie čakaŭ aficyjnaha zahadu, jaki by zmusiŭ niešta rabić, a dziejničaŭ sam adpaviedna paklikańniu serca.
Ja budu malicca, kab talenavityja asoby nie imknulisia adpaviadać kimści naviazanym standartam, a byli sami saboj. Kab nie pradukavali ničoha nia vartyja pradukty-adnadzionki dla taho, kab zarabić na chleb, a mieli mahčymaść rabić toje, da čaho imkniecca ich sutnaść. Kab hetaje absalutna svabodnaje samavyjaŭleńnie kožnaha spryjała ahulnaj spravie — adbudovie našaha šoŭ-biznesu, našaj kulturnaj prastory, našaj Biełarusi.
Ja budu malicca, kab udzielniki roznych składaŭ «Pieśniaroŭ» nie trymali duli ŭ kišeniach, a daravali ŭzajemnyja kryŭdy dy sabralisia razam na adnoj scenie. Kab naš hurt №1 nie zrabiŭsia pomnikam samomu sabie, a byŭ zaŭsiodnym abjektam dla pieraasensavańnia dla inšych pakaleńniaŭ. Kab nastupnyja pakaleńni natchnialisia muzykaj Mulavina, Łučanka, Siemianiaki, Moŭčana i vieršami Kupały, Bahdanoviča, Broŭki, Kulašova.
Kali hetyja malitvy buduć pačutyja, my zrazumiejem usiu marnaść hetaj bitvy za «Malitvu» i budziem ruchacca dalej nie ŭ razburalnym, a ŭ stvaralnym rečyščy.
Siarhiej Budkin, hałoŭny redaktar partału Tuzin.fm
P.S. Za vykanańnie hurtom Naka pieśni «Malitva» padčas kancertu-prezentacyi prajektu «Re:Pieśniary» kampazytar Aleh Moŭčan źbirajecca padavać u sud na kiraŭnika prajektu Siarhieja Budkina, patrabujučy kampensacyju za parušeńnie vyklučnaha aŭtarskaha prava, a taksama kampensacyju za maralnuju škodu. Ahulnaja suma kampensacyi składaje 57 miljonaŭ rubloŭ. Ciapier baki viaduć pieramovy ab mahčymaści dasudovaha vyrašeńnia sprečki.
