Na biełaruskich pradpryjemstvach niedastatkovy temp rostu pradukcyjnaści pracy, a značyć, u ich niama padstaŭ dla pavieličeńnia zarpłat svaim rabotnikam. Takaja vysnova vynikaje sa źviestak aficyjnaj statystyki.
Nahadajem, u kancy lipienia ŭrad pryniaŭ pastanovu № 744 «Ab apłacie pracy rabotnikaŭ», jakaja źviazała pavieličeńnie zarpłat na dziaržpradpryjemstvach z tempami rostu pradukcyjnaści pracy. U jakaści pakazčyka dla vyznačeńnia pradukcyjnaści pracy ŭstanoŭlenaja vyručka ad realizacyi pradukcyi, tavaraŭ, rabot, pasłuh na adnaho siaredniaśpisačnaha rabotnika.
Zhodna z pastanovaj, dla dziaržaŭnych arhanizacyj ustanoŭlena, što rost siaredniamiesiačnaj zarabotnaj płaty rabotnikaŭ dapuskajecca tolki pry ŭmovie apieradžalnaha rostu pradukcyjnaści pracy. Pry nievykanańni nazvanaj umovy fond zarabotnaj płaty za spravazdačny miesiac źmianšajecca da pamieru, jaki zabiaśpiečvaje suadnosiny rostu pradukcyjnaści pracy i zarabotnaj płaty nie mienš jak 1,0.
Miž tym źviestki aficyjnaj statystyki śviedčać, što suadnosiny tempu rostu pradukcyjnaści pracy (vyručki na adnaho siaredniaśpisačnaha rabotnika) i tempu rostu naminalnaj naličanaj siaredniamiesiačnaj zarpłaty ŭ mnohich arhanizacyjach składajuć mienš za 1,0. Tak, u arhanizacyjach Bresckaj vobłaści zhadanyja suadnosiny skłali pavodle vynikaŭ studzienia—lipienia 0,96; na pradpryjemstvach Viciebskaj vobłaści — 0,94; u Minsku — 0,9; u Mahiloŭskaj vobłaści — 0,92; u Hrodzienskaj i Minskaj abłaściach — 0,98; u Homielskaj vobłaści — 0,95.
Takim čynam, zhodna z pastanovaj № 744, mnohija arhanizacyi nie majuć padstaŭ dla pavieličeńnia zarpłat i pavinny byli skarektavać u bok źmianšeńnia fond zarabotnaj płaty da pamieru, jaki zabiaśpiečvaje suadnosiny rostu pradukcyjnaści pracy i zarpłaty nie mienš za 1,0. Normy pastanovy № 744 pavinny vykonvacca pry raźliku zarpłat rabotnikaŭ pačynajučy sa žniŭnia 2014 hoda.
Jak paviedamlałasia raniej, u žniŭni siaredniaja zarpłata ŭ Biełarusi skłała 6,36 młn rubloŭ i ŭpieršyniu ŭ 2014 hodzie źniziłasia ŭ paraŭnańni z papiarednim miesiacam. Źnižeńnie zarpłat u žniŭni ŭ paraŭnańni ź lipieniem adbyłosia va ŭsich rehijonach krainy.
