Hienieralnaja prakuratura Litvy paćvierdziła fakt zatrymańnia na litoŭska-biełaruskaj miažy vysokapastaŭlenaha supracoŭnika biełaruskich pravaachoŭnych orhanaŭ i jaho žonki. U paviedamleńni Hienprakuratury imiony zatrymanych nie nazyvajucca, jany abaznačany inicyjałami D.K. (čynoŭnik) i A.K. (jaho žonka).
Pry hetym partał navinaŭ Dełfi sa spasyłkaj na Hienprakuraturu Litvy paviedamlaje, što zatrymany načalnik upraŭleńnia Śledčaha kamiteta pa Minsku Dźmitryj Kanaplanik i jaho žonka.
U paviedamleńni Hienprakuratury havorycca, što ŭstanoŭleny asoby dvuch hramadzian Biełarusi, jakija byli zatrymany 21 vieraśnia na litoŭska-biełaruskaj miažy ŭ suviazi z tym, što ŭ ich aŭtamabili Honda CR-V byli znojdzieny niekalki dziasiatkaŭ patronaŭ kalibru 9 mm Luger. «Ab zatrymańni dvuch hramadzian va ŭstanoŭlenym paradku było infarmavana pasolstva Biełarusi ŭ Vilni i nieadkładna zadavolena prośba pasolstva ab sustrečy z zatrymanym D.K.», — zaznačaje Hienprakuratura.
Jak rastłumačyła BiełaPAN načalnik adździeła kamunikacyj Hienprakuratury Litvy Alena Marcinoninie, u paviedamleńni ŭkazany tolki inicyjały zatrymanych, tamu što ŭ viedamstvie prytrymlivajucca praviła ab nieabviaščeńni asabistych źviestak. «Ja nie viedaju, čamu ŭ svajoj infarmacyi žurnalisty, nazyvajučy proźvišča zatrymanaha, spasyłajucca na Hienprakuraturu, sa mnoj jany nie źviazvalisia. Ja tolki mahu paćvierdzić, što inicyjały D.K. i A.K. ukazany pravilna. Mužčyna, pavodle našych źviestak, źjaŭlajecca vysokapastaŭlenym načalnikam pravaachoŭnych orhanaŭ vašaj krainy», — zaznačyła jana.
Pavodle słoŭ Marcinoninie, paśla zakančeńnia 48 hadzin i ŭstanaŭleńnia asobaŭ zatrymanyja byli adpuščany z-pad varty.
«Jak tolki adpała patreba ŭtrymlivać ich pad vartaj, było pryniata rašeńnie ab inšaj miery strymańnia, jakaja nie dazvalaje im pakinuć Litvu. Asabistyja dakumienty ŭ ich kanfiskavanyja», — paviedamiła pradstaŭnik litoŭskaj Hienprakuratury.
Pavodle jaje słoŭ, biełarusy padazrajucca ŭ kantrabandzie bojeprypasaŭ dla ahniastrelnaj zbroi. Dasudovaje rasśledavańnie pravodzić kryminalnaja mytnaja słužba, kantraluje hety praces prakuratura Vilniusa. Pa litoŭskim zakanadaŭstvie za takoje złačynstva praduhledžana pakarańnie ad 3 da 10 hadoŭ pazbaŭleńnia voli.
Raniej MZS Biełarusi paćvierdziła fakt zatrymańnia biełarusaŭ.
«My paćviardžajem, što dvoje biełaruskich hramadzian byli zatrymany pry pierasiačeńni litoŭska-biełaruskaj miažy. Zaraz pasolstva Respubliki Biełaruś u Litvie zajmajecca vyśviatleńniem usich akaličnaściaŭ zatrymańnia», — havorycca ŭ paviedamleńni MZS ad 23 vieraśnia.
Načalnik adździeła infarmacyi i suviazi z hramadskaściu centralnaha aparatu Śledčaha kamiteta Biełarusi Siarhiej Kabakovič nie paćvierdziŭ i nie abvierh infarmacyju ab zatrymańni Dźmitryja Kanaplanika. «Usio, što mahu skazać, što zaraz jon znachodzicca ŭ adpačynku», — skazaŭ Kabakovič.
