Pajezdka ŭkrainskaha prezidenta Piatra Parašenki ŭ Kanadu i Złučanyja Štaty prademanstruje nam sapraŭdnuju canu pieramirja na Danbasie i toje, nakolki ŭ Kramli hatovyja ryzykavać tym niešmatlikim, što zastałosia ad rasiejska-amierykanskich adnosin.
Zrazumieła, što Uładzimir Pucin moža atakavać Ukrainu ŭ luby momant. I, tym nie mienš, možna ŭjavić sabie, nakolki vialikaja spakusa pačać novaje ŭvarvańnie mienavita tady, kali ŭkrainski prezident budzie znachodzicca ŭ Vašynhtonie. Bo heta jašče raz padkreślić, što nijaki Abama ŭkraincaŭ ni ad čaho nie abaronić, i kali jany chočuć adčuvać siabie ŭ biaśpiecy, to damaŭlacca treba z Pucinym. Nie vypadkova ž mnohija naziralniki źviazvali vykradańnie supracoŭnika estonskich śpiecsłužbaŭ Kochviera mienavita ź vizitam amierykanskaha prezidenta ŭ Talin. Voś, maŭlaŭ, Abama prylacieŭ i palacieŭ, a rasijskija śpiecsłužby na miežach zastalisia i mohuć, kali im zamaniecca, pierajści hetyja miežy ŭ luby momant.
I choć ja schilny źviazvać vykradańnie estonskaha vyviednika z kryminalnymi intaresami samich rasijskich śpiecsłužbaŭ, a zusim nie z Abamam, va ŭkrainskim vypadku schilnaść da «psichičnaj ataki» sapraŭdy moža spracavać. Mienavita tamu bližejšyja dni prademanstrujuć nam kramloŭskuju tempieraturu lepš, čym lubyja inšyja.
U Maskvie nie mohuć nie razumieć, što napad padčas vizitu Parašenka ŭ Złučanyja Štaty — heta jakraz vyklik u bolšaj stupieni ZŠA, čym Ukrainie. I što Złučanyja Štaty buduć hatovyja reahavać — novymi ekanamičnymi sankcyjami, pastaŭkami zbroi, dyj źnižeńniem cany na naftu, u rešcie rešt! A ciapier u Rasii zusim nie taja ekanamičnaja situacyja, kab ihnaravać hetyja akaličnaści.
I kali hetaje ihnaravańnie sapraŭdy budzie mieć miesca, my pierakanajemsia ŭžo nie ŭ ahresiŭnaści pucinskaha režymu — u hetym nas pierakonvać nie treba. My pierakanalisia ŭ tym, što Kreml nie hatovy praličvać ryzyki i zdolny dziela demanstracyi svajoj mahutnaści i pahardy da amierykancaŭ puskacca ŭ adkryta samahubčyja avantury.
Zrešty, i heta mianie nie ździvić. U rešcie rešt, i Krym, i vajna za Danbas — heta taksama samahubčyja avantury. Ale sa stratehičnaj punktu hledžańnia, a stratehijaj ŭ Kramli zajmacca niama kamu. A voś napad na Ukrainu ŭ pieryjad amierykanskaha vizitu Parašenka budzie ŭžo taktyčnaj avanturaj. I heta stanie nastupnym etapam kiraŭnickaj dehradacyi tych, chto z nami vajuje.
