U novaj Jeŭrapiejskaj kamisii nie budzie kamisara pa pytańniach pašyreńnia, ale budzie kamisar pa pytańniach Jeŭrapiejskaj palityki susiedstva i pieramoŭ pa pašyreńni.
Na hetuju pasadu prapanujecca Jochanes Chan, jaki ŭ składzie kamisii prezidenta Žaze Manuela Barozu zajmaje pasadu kamisara pa pytańniach rehijanalnaj palityki. Prezientacyja novaha składu Jeŭrakamisii adbyłasia ŭ sieradu ŭ Bruseli.
Zhodna z bačańniem novaabranaha prezidenta JEK Žana-Kłoda Junkiera, u abaviazki kamisara buduć uvachodzić pytańni ŭzmacnieńnia palityki susiedstva i pieramovy adnosna pašyreńnia, jakija ŭžo praciahvajucca.
«ES treba adpačyć ad pašyreńnia, kab my zmahli abjadnać toje, što było dasiahnuta siarod 28 krain-siabroŭ», — skazaŭ jon.
U pryvatnaści, pierśpiektyva siabroŭstva budzie dla Zachodnich Bałkan, ale ŭ bližejšyja piać hadoŭ pašyreńnia ES nie budzie.
Za źniešniuju palityku, jak užo viadoma, budzie adkazvać abranaja Viarchoŭnym pradstaŭnikom ES pa pytańniach źniešniaj palityki i palityki biaśpieki, vice-prezident JEK dziejučy ministr zamiežnych spraŭ Italii Frederyka Mahieryni.
Źniknie ŭ novaj kamisii i pasada kamisara pa enierhietyčnych pytańniach. Zatoje budzie stvorana pasada vice-prezidenta Enierhietyčnaha Sajuza, na jakuju prapanoŭvajecca pryznačyć Alonku Bratušak, eks-premjera Słavienii.
U skład JEK Junkiera ŭvachodziać 5 byłych premjer-ministraŭ, 4 vice-premjer-ministraŭ, 19 byłych ministraŭ, 7 byłych členaŭ Jeŭrakamisii, 8 byłych členaŭ Jeŭrapiejskaha parłamienta.
Žančyny składajuć kala 33% ad składu Kamisii, mužčyny — kala 66%. Novy skład JEK jašče pavinien zaćvierdzić Jeŭrapiejski parłamient.
