«Uzbroić Ukrainu abo kapitulavać» — kamientar pad takim zahałoŭkam apublikavaŭ va ŭpłyvovaj amierykanskaj haziecie «Ńju-Jork tajms» Ben Džuda.
Rasija i Ukraina viaduć vajnu, piša jon. Pucin nie pakinuŭ Zachadu dobrych opcyj, pryznaje jon, ale i rabić niešta treba. Varyjanty jość dva, abodva jany ryzykoŭnyja. Abo ŭzbrojvać Ukrainu, abo prymusić Kijeŭ zdacca i dazvolić Pucinu adkraić sabie ad Ukrainy stolki terytoryi, kolki jon zachoča.
Zachad pavinien być z Ukrainaj sumlennym. Krainu abnadziejvali budučym siabroŭstvam u Jeŭrasajuzie i NATA. Kijeŭ da hetaha imkniecca, ale pry hetym Zachad nie daje Ukrainie srodkaŭ dla viadzieńnia vajny, ad vyniku jakoj zaležyć samo isnavańnie dziaržavy.
Ukrainu źniščajuć. Jaje ekanomika zrujnavanaja. A vojska nie vytrymaje nastupu Rasii. Ukraincy šukajuć paratunku ŭ ramantyčnym nacyjanaliźmie i rychtujucca da partyzanskaj vajny.
Jašče niekalki miesiacaŭ bieź istotnaj zachodniaj padtrymki, i Ukraina stracić bajazdolnaje jadro svajoj armii, papiaredžvaje aŭtar. A razam ź im stracić i vieru ŭ Zachad. Na źmienu joj pryjdzie pačućcie zdrady. Ukraina moža pieratvarycca ŭ jeŭrapiejskuju Siryju.
My nie možam takoha dapuścić, piša «Ńju-Jork tajms». Treba źmirycca z tym faktam, što dalejšaje pašyreńnie Jeŭrasajuza i NATA moža adbycca koštam niepramoj vajny z Rasijaj — i treba być hatovym vieści takuju vajnu.
Łohika patrabuje, kab u Kijeŭ prybyli zachodnija vajskovyja daradcy, kab Ukraina atrymała poŭny dostup da źviestak raźviedki i spadarožnikavaha nazirańnia. Treba pastaŭlać zbroju i bieśpiłotnikaŭ. Kali rasijskija tanki rušać hłybiej za Danbas, kab zachapić dla Rasiju suchaziemnuju darohu ŭ Krym, treba navat być hatovym da raźmiaščeńnia vojskaŭ NATA.
Biezumoŭna, taki šlach toić vializnyja ryzyki, pryznaje aŭtar. Rasija tady ŭdaryć pa Ukrainie z usioj siłaj. Amierykanskamu i brytanskamu śpiecnazu pryjdziecca tady ŭziać pad kantrol aeraporty Kijeva i Adesy. Ale Pucin moža paŭtaryć toje, što Rasija ŭžo zrabiła ŭ Pryšcinie ŭ 1999: skinuć desant, kab atačyć ich.
Kali ž Zachad nie hatovy iści na takija ryzyki, piša «Ńju-Jork tajms», tady treba ŭhavaryć ukraincaŭ raźvitacca ź ich śmiarotna niebiaśpiečnymi iluzijami. Nie treba tady, kab ukrainskuju moładź namarna małoła rasijskaja miasarubka.
Adziny šlach tady — kab Zachad zmusiŭ Ukrainu zdacca. Ukraina całkam zaležyć ad hrošaj MVF, tamu vymušanaja budzie padparadkavacca. Tady treba skazać Kijevu, kab jon źmiryŭsia z fait accompli, što Rasija vyčleniła sabie novuju «asieciju» ŭ Danbasie— abo MVF adklučyć hrošy. Tady treba suciešyć ukraincaŭ: los Hruzii numar dva nie najhoršy.
Kali iści hetym druhim šlacham, my ŭratujem tysiačy žyćciaŭ, piša hazieta. Ale heta budzie poŭny razhrom Zachadu. Rasija adnović svoj impierski status. Krainy byłoha SSSR viernucca pad kantrol Rasii, a Zachad, takim čynam, pryznaje prava Rasii napaści na lubuju z hetych krain i źmianić ich miežy pa svaim žadańni.
Rasija razburyć suśvietny paradak, stvorany paśla parazy SSSR u chałodnaj vajnie. Amieryki ŭ śviecie pierastanuć bajacca. Vorahi Amieryki — ad Kitaja da Irana — jasna adčytajuć hety sihnał.
Dyj sama Rasija na Ukrainie nie spynicca. Pucin budzie imknucca asłabić NATA i, jak tolki adčuje słabinku, pojdzie dalej. Budzie tolki pytańniem času stvareńnie novych zon «zamarožanych kanfliktaŭ» u krainach Bałtyi, dzie žyvie ruskamoŭnaje nasielnictva. Polšča budzie vymušana dziejničać tak, niby NATA niama, i stvarać abarončy aljans u Bałtyjskim rehijonie. Varšava, mahčyma, moža navat stvaryć bufiernuju zonu ŭ Zachodniaj Ukrainie.
Niama lohkaha vyjścia ź situacyi va Ukrainie, piša aŭtar haziety. Ale nielha, kab tysiačy ŭkraincaŭ hinuli praz vahańni Zachadu. Treba być sumlennymi ź imi ŭ tym, što Zachad nie choča vieści novuju chałodnuju vajnu z Rasijaj za niezaležnaść Ukrainy. Ale kali my zmusim ukraincaŭ zdacca, padsumoŭvaje jon, to zdacca pavinny i NATA, i Jeŭropa, i libieralnaja demakratyja. Voś pierad jakim vybaram staić śviet.
